Shillong, Naitung 23:
Ka Laitkor Sports Club bad ka Mawlai Sports Club kin ïaknieh ban ïoh rah ïa ka nam lahduh jong ka lympung Shillong Sports Association’s Women’s League 2023. Kane ka wan urlong hadien ba ki la ïoh rung sha ka final jong kane ka lympung da kaba khur jingjop ha ka jingïalehkai semi-final kaba la long ha ka sngi Saitjaiñ, ha SSA Stadium ha First Ground, Polo.
Lah ban pynkynmaw ba ha u snem 2022, ka jingïakhun final jong katei ka lympung ka la long hi hapdeng ka Laitkor SC pyrshah ïa ka Mawlai SC bad ka Mawlai kala jop bad rah ïa ka nam lahduh ha ka extra time da 2-1 kol bad mynta u snem ruh kine kijuh hi ki kynhun kin ïakhun biang ïa ka final jong ka SSA Women’s League 2023.
Haba phai sha ka jingïakhun ïa ka semi-final, ka Laitkor ka la lah ban pynliem noh ïa ka Lumparing da 4-1 kol.
Ka Catherine Kharkongor kala ioh ban thep ïa ka kol na ka bynta ka Lumparing ha ka minit kaba 15 hynrei hadien kane ka Laitkor ka la ïalehkai tyngeh bad hashwa ban kut ka kylla step ha ka minit kaba (35’+2) ka Iaraplang Nongrum kala thep ïa ka kol kaba itynnad da ka ‘bicycle kick’.
Ka Laitkor ka la bteng ban ïalehkai bha ha ka kylla miet bad ka Iaraplang ka la ïoh ban thep ïa ka kol kaba ar ha ka minit kaba 55 bad 5 minit hadien kane ka Saralin Warlarpih ka la ïoh ban thep ïa ka kol bad ha ka minit kaba 64 ka Iaraplang ka la ïoh ban thep kol biang bad ïoh syndon ïa ka hat-trick bad ka Iaraplang kala ïoh ruh ïa ka nam Player of the Match.
Ka jingïakhun hapdeng ka Mawlai bad ka PFR Football Academy kala kut noh ha ka jingïakhiad da mar 1-1 kol hynrei dei ha ka Penalty Shootout ba ka Mawlai ka la jop ïa ka PFR da 4-2 kol.
Ka Marbarin Nongrum kala thep ïa ka kol ha ka minit kaba 19 na ka bynta ka Mawlai hynrei ha ka minit kaba 22 ka PFR kala ïoh ban pynphai kylla da ka jingthep kol ka Betsheba Kharsyntiew.
Hadien ba kane ka jingïakhun kala kut noh ha ka jingïakhaid, kumta la pynlong noh da ka Penalty Shootout ha kaba ka Mawlai kala ïoh ban thep 4 kol katba ka PFR kala lah ban thep tang 2 Kol. Ka Marbarin kala ïoh ïa ka nam Player of the Match.
Ka final jong ka Women’s League hapdeng ka Mawlai pyrshah ïa ka Laitkor kan long ha ka 29 tarik u Naitung ha SSA Stadium ha ka por 3:30 mynsngi.
