Jowai, Naitung 24:
Ka Luti Tuber Ïalong ka la pynliem noh ïa ka Lumpariat da 1-0 kol ha ka lympung ïalehkai Independence Day Cup Under-17 kaba la long ha madan Kiang Nangbah Stadium Ladthadlaboh, Jowai.
Kane ka nam jop ka la wan urlong lyngba ka shi kol ba la thep da u Denis Mulieh ha ka minit kaba 36.
Haba phai sha kawei pat ka jingïalehkai kaba bud hapdeng ka Tpeppale bad ka Mooknor Thadmuthlong, ki la ïasam mar shi dor-thong (point) hadien ba ïakhaid mar 1-1 kol.
Ka Mooknor Thadmuthlong ka la ïoh pynkhih jar nyngkong eh lyngba u Heinthrang Lyngdoh ha ka minit kaba 30, hynrei ka Tpeppale ka la lah ban pynphai kylla lyngba u Jopibromitre Dkhar ha ka minit kaba 33 na ka bynta ban ïakhaid mar shi kol.
