Shillong, Naitung 24:
Ka Lumparing SC bad ka West Jaiñtia Police ki la khur ïa ka nam lahduh ha ka lympung ïalehkai 1st Women’s 4ForAll Cup bad ka Men’s Veteran 4ForAll Cup 2023.
Ïa kane ka lympung la pynïaid da ka 4ForAll ha Diengïong kaba ha Mawdiangdiang naduh 17 haduh 22 tarik mynta u bnai.
Ha ka jingïakhun final jong ki kynthei kaba la long ha ka Sngi Saitjaiñ, ka Lumparing SC ka la pynliem noh ïa ka Synrop FC (Team-A) da 4-1 kol. Katba ha ka jingïakhun jong ki shynrang, ka West Jaiñtia Police ka la pynliem ïa ka PFH FC da 6-3 kol.
Ïa ka nam Best Player ha ka liang ki kynthei la khur da ka Veronica Paton (Lumparing SC), Youngest Player ka leit sha ka Baphinrisha Kharsamai (kaba dang 11 snem ka rta. Ïa ka nam Best Players ha ka liang ki shynrang la khur da u Niwan O Gatphoh (West Jaiñtia Police), katba u Bah Tenzing Khriem (63 snem ka rta) u la long u rangïalehkai ba kham rangbah na baroh ki nongïashim bynta.
Ha katei ka sngi la ïadon lang u Bah Lamphrang Blah, Chairman ka KHADC, kumjuh u Bah Fantin Lakadong, EM ka KHADC, ka Director ka tnat ïalehkai jong ka Sorkar Jylla ka Kong Isawanda Laloo (IAS).
