Shillong, Naitung 24:
Lai tylli ki kynhun ïalehkai na East Khasi Hills ki la khur ïa ka jingjop ha kaba sdang ïa ka State Level Subroto Mukherjee Cup 2023 ha ka Lah Sngi U Blei ha kane ka nongbah.
Kine ki kynthup ïa ka Umphyrnai Presbyterian SS (Under-14), Assam Rifles Public School (Under-17 Boys) bad ka Ïewrynghep SS (Under-17 Girls). Ha kane ka lympung la wan ïashim bynta da ki kynhun ïalehkai kiba la khur ïa ki nam jop na baroh 12 tylli ki district. Ïa kane lympung ba la pynïaid da ka tnat ïalehkai ka Sorkar Jylla, la phiah ha ki lai tylli ki kyrdan.
Ha ka Under-14 kaba la long ha SAI Training Centre, ka Umphyrnai Presbyterian SS (EKH) ka la sdang da ka jingjop hadien ba ka lah pynliem noh ïa ka Mawbidong SS (SWKH) haduh shi dorjon (12-0). U Robindor Kyrsian (4,8 & 40) bad u Ricky Kharkongor (10,37 & 42) ki la khur ïa ki hat-trick, kumjuh u Gonestar Marweiñ (35 & 55) bad u Baniar Kharsahnoh (54 & 57) ki la ïathep mar ar kol, katba ïa ki shi kol la thep da u Donestar M.Ngap (10) bad u Bankitbok Mylliemngap (32).
Ka Little Stars English Medium SS (EWKH) ka la jop da 5-0 kol ïa ka Rongsang A.Bagre SS (SWGH). U Kerbinson Marweiñ (13 & 22) u la thep ar kol, katba ïa ki shi kol la thep da u Ebenezer Sun (36), Kishan Wahlang (52) bad u Rishan Lyngkhoi (58).
Ka St. Peters HSS (WKH) ka la ïasam mar shi dor-thong (point) bad ka Bamil LP School Mansang (EGH) hadien ba ïakhaid mar 1-1 kol. U Banshanskhem Nongphud (33) u la ïoh pynkhih jar nyngkong eh na ka bynta ka St. Peters, katba ka Bamil ka la lah ban pynphai kylla lyngba u Tengba A. Sangma (49).
Katba ka H.K Sing SS (West Jaiñtia Hills) bad ka Monfort Hr SS (North Garo Hills) ki la ïakhaid khlem don ba lah ban thep kol.
Ha ka Under-17 (boys) kaba la long ha Third Ground Polo, ka Assam Rifles Public School (East Khasi Hills) ka la khur ïa ka jingjop hadien ba lah pynliem noh ïa ka Bakenang SS (North Garo Hills) da 5-0 kol. U Emanbha Marbaniang (21,39 & 41) u la khur ïa ka hat-trick, katba ïa ki shi kol la thep da u Phermanbha Lyngdoh (2) bad u Milli August (29).
Ka Myngken Christian HSS (Ri Bhoi) ka la shah rem noh ha ka Okkapara SS (South West Garo Hills) lyngba ka shi kol ba la thep da u Weltin Sangma (54).
Ka Rymbai Presbyterian HSS (East Jaiñtia Hills) ka la pynliem noh ïa ka Mairang Presbyterian HSS (Eastern West Khasi Hills) lyngba ka shi kol ba la thep da u Bankerbha Dkhar (28).
Ka North Liberty HSS (West Jaiñtia Hills) ka la ïakhaid mar 1-1 kol pyrshah ïa ka Sibsingh Memorial Govt HSS (West Khasi Hills). Ha kane ka jingïalehkai, ka North Liberty ka la pynkhih jar nyngkong lyngba u Rio Marboh (2), hynrei u Rishandabok Marweiñ (26) u la lah ban pynphai kylla na ka bynta ka Sibsingh.
Haba phai sha ka Under-17 (girls) kaba la long ha madan Heh Mini Stadium kaba ha Mawlai Phudmuri, ka Sibsingh Memorial Govt HSS (West Khasi Hills) ka la pynliem noh ïa ka Telekali SSA UPS (South Garo Hills) da shiteng dorjon (6-0 kol). Ka Younishna Thabah ka la thep marwei haduh saw kol ha ka minit kaba 23, 42,52 & 26, katba ïa ki shi kol la thep da ka Philasakhi Marngar (27) bad u Ibadondor Nongsiej (50).
Ka Ïewrynghep SS (East Khasi Hills) ka la pynjem khnap ïa ka Monfort Dilni Bolchugre School (West Garo Hills) haduh 7-0 kol. Ka Ibashembha Khongsit (4 & 29) bad ka Ibabarihun Nongsiej (33 & 58) ki la thep mar ar kol. katba ïa ki shi kol la thep da u Ibalari Nongrum (2), Larihun Songthiang (55) bad ka Melari Lyngdoh (59).
Ka Saiden SS (Ri Bhoi) ka la jop haduh 7-0 kol ïa ka Rongrong Union UPS (North Garo Hills). Ka Daïamon Makhroh ka la ïoh ban thep marwei haduh saw kol kata ka ka minit kaba 1,14,45 & 56. Kumjuh ka Rimeka Khongkai (9 & 39) ka la thep ar kol, katba ïa ka shi kol la thep ïarap pynthep da ka Baltera G. Momin (28).
Ka North Liberty HSS (West Jaiñtia Hills) ka la jop da 6-1 kol ïa ka Little Stars English Medium SS (Eastern West Khasi Hills). Tang mar ïasdang ka North Liberty ka la ïoh ei shi kol naba bakla thep hi ka Samaka Nongrum (3).
Kane ka kynhun ka la thep biang ar kol lyngba ka Daphimon Khyriem (20 & 46), katba ïa ki shi kol la thep da ka Dakini Shylla (8), Beatify Shylla (29) bad ka Eiladki Ksoo (31). Katba ka Little Stars ka la pynphai kylla shi kol lyngba ka Evamerry Myrthong (9).
