Shillong, Naitung 24:
Ka kynhun ïalehkai ka Jylla ka la shah kynthup ha ka thup ba kham jwat ha ka Hero Junior Boys’ National Football Championship (Tier 1) na ka bynta ka Dr. BC Roy Trophy 2023-24 ka ban long ha Bhubaneswar, Odisha.
Ha kane ka lympung, ka Meghalaya kaba la don ha ka Group-B kan hap ban ïakhun pyrshah ïa ka Kerala, West Bengal bad ka Jammu & Kashmir.
Kin don haduh 16 tylli ki kynhun ki ban ïashim bynta ha kane ka lympung ka ban phiah ha ki saw tylli ki group ha ka Tier 1. Ki saw tylli ki kynhun ki ban wan ha ki kyrdan ba hakhlieh na kitei ki group kin ïoh rung sha ka semi-final.
Ïa kane ka lympung ïalehkai jong ka BC Roy Trophy yn sdang naduh 5 haduh 15 tarik u Nailur mynta u snem.
Kane ka aïom ïalehkai 2023-24 kan dei ka jingwanphai biang ka BC Roy Trophy ha ka sien kaba nyngkong ka jingshah lynshop ha ka khlam COVID-19. Katba ha ka aïom ïalehkai 2019-20 la rah da ka Mizoram hadien ba ka lah ban pynliem noh ïa ka Punjab lyngba ka tie-breaker da 5-4 kol ha ka nongbah Shillong.
Ha katei ka jingïakhun jong ka Group-B, ka Meghalaya kan ïakhun nyngkong pyrshah ïa ka West Bengal ha ka 6 tarik u Nailur, kumjuh ïa ka Jammu & Kashmir ha ka 8 tarik bad ïa ka Kerala ha ka 10 tarik u Nailur.
Kiwei pat ki kynhun kiba la don ha ka Group-A ki long ka Mizoram, Karnataka, Jharkhand bad ka Maharashtra. Ha ka Group-C ki long ka Uttar Pradesh, Haryana, Chhattisgarh bad ka Odisha. Katba ha ka Group-D ki long ka Punjab, Goa, Tamil Nadu & Sports Authority of India.
