Shillong, Naitung 25:
U rangïalehkai ‘dien ka Manchester United u Raphael Varane u la ong ba ka kynhun jong u ka lah ban beh thong ïa ka Manchester City ha ka aïom ïalehkai ka ban wan jong ka Premier League.
U Varane u la ong ba kane ka kynhun jong u Erik ten Hag kaba la lah ban ïalehkai bha ha ka aïom ba la dep ka lah ban pynliem noh ïa kano kano ka kynhun ha ka pyrthei. Ka Man United ka la wan ha ka kyrdan balai ha ka aïom ba la dep kata hadien ka Arsenal bad bud sa ka Man City kum ka lahduh.
Hynrei na ka liang u Varane u la pynpaw ïa ka jingkhmih lynti ba ka Man United kan pyni bor pyrshah ïa ka kynhun jong u Pep Guardiola ha ka aïom ka ban wan.
“Ngi dei ban don ïa ka jingsngewskhem,” la ong u Varane halor ka jingkylli la ka Man United ka lah ne em ban beh ïa ka City ha ka aïom ka ban wan.
“Teng teng ka jingïapher hapdeng ka kynhun kaba khlaiñ bor bad ka kynhun kaba wan ha ka kyrdan ba hakhlieh ki don la ki jong ki rukom pyrkhat. Ka dei ka aïom ïalehkai kaba thymmai bad kiei kiei ki long kiba lah. Ban beh ïa ka Man City ka dei ka thong kaba hakhmat eh, hynrei ngin hap ban long kiba la khreh.”
“Ka Premier League ka long ka lympung kaba eh bha ban jop. Ka lah ban long kaba eh, hynrei ngi la long ba la khreh ha manla ki jingïakhun. Nga sngew ban ong ba kumba ngi la lah ban pyni ïa ka mynsiem ïakhun ha ka aïom ba la dep, ngi lah ban pynliem ïa kano kano ka kynhun ha ka pyrthei,” u la bynrap.
