Jowai, Naitung 25:
Ka 7 Wasa United ka la pynliem noh ïa ka Dongmihsngi da 3-1 kol ha ka lympung ïalehkai Independence Day Cup Under-17 Football Tournament ba la pynïaid da ka West Jaiñtia District Sports Association ha madan Kiang Nangbah Stadium Ladthadlaboh, Jowai.
Tang mar ïasdang ka jingïalehkai, ka 7 Wasa ka la lah ban pyni ïa ka jingkhlaiñ bor da kaba ïoh ban thep ar kol lyngba u Riphi O Shylla ha ka minit kaba 1 & 2 na ka bynta ban tam ar kol ha ka kylla step.
Hadien katto katne por ba la bteng ïa ka jingïakhun jong ka kylla miet, ka 7 Wasa ka la pynbud biang ïa ka kol kaba ar lyngba u Mehipaia Dan ha ka minit kaba 51. Ka Dongmihsngi ka la lah ban pynphai kylla shi kol lyngba u Robert A Tang ha ka minit kaba 57 ha shwa ban kan mad ïa ka jingshah rem.
Haba phai sha kawei pat ka jingïakhun hapdeng ka Mynthong bad ka Sohmynting ki la ïasam mar shi dor-thong (point) hadien ba kim shym lah ban thep kol haduh kaba kut ka jingïalehkai.
