Shillong, Naitung 25:
Ka lympung ïalehkai State Level Subroto Mukherjee Football Tournament ba pynïaid da ka tnat ïalehkai ka Sorkar Jylla ka la nang jam shaphrang ha ka sngi kaba ar ha kane ka nongbah.
Ha ka jingïakhun jong ka Under-14 ki shynrang kaba la long ha ka sngi Ba-ar ha SAI Traning Centre, ka Bamil L.PS Mangsang (East Garo Hills) ka la pynliem noh ïa ka Dabit Ampangdam S.S.A School (South Garo Hills) da 3-0 kol. U Driamy N. Arengh (41 & 48) u la thep ar kol, katba ïa kawei pat la thep kham hashwa da u Walchuang N. Marak (37).
Ka St. John SS (West Garo Hills) ka la shah rem da 4-1 kol ha ka Monfort HSS (North Garo Hills). U Nikgam D.A Sangma u la khur ïa ka hat-trick hadien ba ïoh thep kol ha ka minit kaba 13, 28 & 40, katba ïa kawei pat la thep da u Topay Momin (43). Na ka St. John la thep da u Wanchiang K. Marak (36).
Ka K.B Memorial SS (East Jaiñtia Hills) ka la pynjem khnap ïa ka Rongsang A. Bagre SS (South West Garo Hills) da 6-0 kol. U Cifullmi Shylla (16 & 23), Jerimi Dkhar (30 & 46) bad u Lyonel Ryngkhlem (6 &7) ki la thep mar ar kol.
Ka Mynken HSS (Ri Bhoi) ka la ïasam mar shi point ha ka jingïakhun pyrshah ïa ka Umphyrnai Presbyterian SS (East Khasi Hills) hadien ba ïakhaid mar 4-4 kol. U Ricky Kharkongor u la thep haduh saw kol na ka bynta ka Umphyrnai ha ka minit kaba 4,17,19 & 20, katba u Chanjib Chetry na ka Mynken u la khur ïa ka hat-trick hadien ba ïoh thep ha ka minit kaba 9,17 & 19 bad ïa kawei pat la thep da u Me-uba.ai Sumer (8).
Ha ka Under-17 ki shynrang kaba la long ha madan Third Ground Polo, ka Rangthong Christian HSS (South West Khasi Hills) ka la shah rem da 2-0 kol ha ka Okkapara SS (South West Garo Hills). Ïa kine kol la thep da u Toningbath Sangma (30) bad u Weltin Sangma (50).
Ka Mairang Presbyterian HSS (Eastern West Khasi Hills) ka la pynliem noh ïa ka Nilwagre SS (South Garo Hills) da 3-0 kol. Ïa kine kol la thep da u Franky L Marweiñ (7), Youngbut Nongbet (23) bad u Denistar Nongrah (45).
Ka North Liberty HSS (West Jaiñtia Hills) ka la pynliem noh ïa ka Rongrengre Govt HSS (East Garo Hills) lyngba ka shi kol ba la thep da u Gideon Mukhim (10).
Ka Bekanang SS (North Garo Hills) ka la pynliem noh ïa ka Dobasipara SS (West Garo Hills) da 3-0 kol. U Lian Ch Sangma (26 & 55) u la thep ar kol, katba ïa kawei pat la pynbud da u Konaton Rabha (60+2).
Haba phai sha ka Under-17 ki kynthei kaba la long ha madan Heh Mini Stadium, ka Little Stars English Medium SS (Eastern West Khasi Hills) ka la pynliem noh ïa ka Birin Nuchong SS (South West Garo Hills) da 4-1 kol. Ïa kine kol la thep da ka Isha Warjri (15+6), Naphibanlamlynti L. Mairang (43) bad ka Evamerry Myrthong (50). Katba na ka Birin la ïarap pynthep da ka Nelfinia Syiem (29).
Ka Chachat UPS Rongjeng (East Garo Hills) ka la shah rem noh ha ka Telekali SSA U.P.S (South Garo Hills) da 3-1 kol. Ka Nenganchi N. Sangma (9 & 49) ka la thep ar kol, katba ïa kawei pat la thep da ka Silinda R. Marak (60+2). Na ka liang ka Chachat ka la pynphai kylla shi kol lyngba ka Attamchi Sangma (30+2).
Ka Rangthong Christian HSS (South West Khasi Hills) ka la jop da 4-1 kol ïa ka Monfort Dilni Bolchugre School (West Garo Hills). Ïa kine kol la thep da ka Eightfulness Shangdiar (22 & 58) bad ka Rikynti Lyngkhoi (30+1 & 33). Katba na ka Monfort la pynphai kylla shi kol da ka Sengchame Ch Momin (60+1).
Ka Khliehriat HSS (East Jaiñtia Hills) ka la pynjem khnap ïa ka Rongrong UPS (North Garo Hills) da 6-0 kol. Ka Felicia Sympli (14,37 & 43) ka la khur ïa ka hat-trick, ïa ki ar kol la thep da ka Phyrnaibha Nongtdu (38 & 57) bad ïa kawei pat la thep da ka Diwakapaya Shylla (55).
