Shillong, Naitung 25:
Ka FC Barcelona kan hap ban shim ïa ka rai na ka bynta ka lawei jong u Raphinha wat hapdeng ka jingthrang ka Manchester City ban wanrah ïa utei u rangïalehkai na Brazil.
Utei u rangïalehkai shakhmat u la pynïasoh sha ka Barcelona na ka Leeds United ha u Naitung jong u snem ba la dep ha ka jingsiew kaba £55 million ($71 million).
Ha ka jingïalehkai na katei ka klob ha Camp Nou, utei u rangïalehkai u la don hapdeng ki jingeh bad kumjuh ki jingjop ha ka jingïaid lynti. Hynrei, da ka jinglah ban thep kol bad ïarap pynbuh bol ka la pynlong ïa ka Barcelona ban khur ïa ka nam lahduh kaba nyngkong ha ki saw snem.
Wat ha ka aïom ïalehkai 2022-23 kaba la poi sha kaba kut, hynrei ki la mih ki khubor ba u Raphinha u la don ka jingthmu ban leit ïasoh noh sha ka Newcastle United kaba buh ka jingtyrwa ïa ka kontrak kaba €80 million ($88 million).
Hynrei ki khubor kiba la mih ha ki taïew ba la lah la ong ba kajuh ka Public Investment Fund kaba la long trai ïa ka Newcastle, bad mynta kaba pynïaid ïa ki saw tylli ki klob kiba heh jong ka Saudi Arabia, ka la kyrpad ïa ka Barca ba kan ailad ïa utei u rangïalehkai ba dang 26 snem ka rta ban leit ïasoh sha ka Al-Hilal.
Kumjuh ruh ha ka sngi Balang, ka la mih ka khubor halor ka jingthrang ka lahduh jongka Premier League ka Manchester City kaba la pyrshang ban wanrah ïa u Raphinha sha England lada u Riyad Mahrez u leit ïalehkai noh sha Saudi Arabia.
Lada kine ki urlong ka City kan mynjur ïa ka kontrak kaba £30 million ($38.7 million) bad ka Al-Ahli na ka bynta utei u rangïalehkai na Algeria.
Hynrei la ong ba ka Barca bad u Raphinha ki dangpynkhreh ban sngap ïa ka jubab na ka Al-Hilal, bad ka jingmih u Mahrez kan pynlong ïa ka Manchester City ba kan leit buh ka jingtyrwa na ka bynta ban soi ïa utei u rangïalehkai na Brazil.
