Shillong, Naitung 26:
Ka jingtbit u Lionel Messi kum u rangïalehkai ka la ïai bteng ban pynlong ïa ka Inter Miami ban pynliem noh ïa ka Atlanta United da 4-0 kol ha ka Leagues Cup na ka bynta ban jam sha kawei pat ka wat ïakhun ha United States.
Ha ka sien nyngkong ka jingleit ïalehkai na ka klob kaba thymmai, utei u khlur ïalehkai ka Argentina u la lah ban pyni ïa ka jingtbit da kaba ïoh ban thep ar kol bad ïa kiwei pat ki ar kol la thep da u Robert Taylor na ka bynta ban pynlong ïa katei ka kynhun ban khur ïa ka jingjop.
Hadien ba u la ïoh ban ïalehkai nyngkong kum u rangïalehkai shongben pyrshah ïa ka klob na Mexico ka Cruz Azul, utei u rangïalehkai barim ka PSG u la ïoh ban thep ïa ka kol kaba nyngkong ha ka minit kaba 94.
Ha ka jingïalehkai pyrshah ïa ka Atlanta, utei u khlur ïalehkai uba la khur haduh hynñiew sien ïa ka khusnam Ballon d’Or um shym la pynlehnohei ïa ka kabu ksiar naba u la ïoh ban thep kol ha ka minit kaba 8 hadien ba u la ïoh ïa ka bol na u para nongïalehkai na ka Barcelona u Sergio Busquets bad ka la long kaba suk ïa utei u khlur ïalehkai ban thep kol.
U Messi u la bteng biang ban thep ïa ka kol kaba ar ha ka minit kaba 22 bad ïa kane la ïatrei lang bad u Taylor. Kane ka la wan hadien ba u Messi u la lah ban pynpra ïa ki rangïalehkai ‘dien ka Atlanta ha shwa ba u Taylor un pyllait ïa ka bol sha utei u khlur ïalehkai uba la 36 snem ka rta na ka bynta ban tam 2-0 kol.
Ha shwa ban kut ka jingïalehkai jong ka kylla step, ka Miami ka la pynbud biang ïa ka kol kaba lai hadien ba u Messi u la pynbuh bol ïa u Benjamin Cremaschi, ha kaba ka bol kaba u la shut ka la her sha u Taylor, u bym shym la pynlehnohei ïa kane ka kabu ksiar.
Hadien phra minit ba la bteng biang ïa ka jingïakhun jong ka kylla miet, u Messi u la ïoh ban rah ïa ka bol na ka bynta ban pynbuh ïa u Taylor, u bym shym la pynlehnohei biang ïa ka kane ka kabu ksiar.
Wat la ka Atlanta ka la shah thep kol, pynban ki rangïalehkai ki la ïoh ïa ki katto katne ki kabu kiba biang, hynrei u Thiago Almada um sym la lah ban pynurlong na ka daw ka jingïashan tyngeh u rangapkol ka Miami.
Lyngba kine ki ar tylli ki jingjop ha ka Leagues Cup (group stage) ka la pynlong ïa ka Inter Miami ban bat ïa ka kyrdan ba hakhlieh.
