Jakarta, Nailar:
Ka United States Geological Survey (USGS) ha ka Sngi Palei ka la iathuh ba u jumai uba 5.2 ha ka Richter Scale u la pynkhynñiuh ia ka Indonesia ha ka Sngi Palei. Ia utei u jumai la lah ban iohsngew kumba 142 Kilometre na ki bynta jong ka Tual hapoh Indonesia bad ka la jia ruh ha ka por kumba 7:30 eiei ha katei ka step.
Katkum ka kaiphod na ka USGS, la ong ba utei u jumai u la pynkhynñiuh ia kumba 90.5 Km bad ia ka jingkhlaiñ jong u la buh jingkheiñ ba un long kumba 5.7770S Latitude bad 131.4780E Longitude.
Ha kane ka jingjia ym shym la ïohsngew ne ioh jingtip eiei ba kin don kiba ngat ne mynsaw na utei u jumai uba khynñiuh ha katei ka sngi.
Ka nongbah Tual, ka dei kaba don ha ka thaiñ Maluku jong ka Indonesia bad kaba hap ruh hapoh jong ka Kei Islands.
La ong ruh ba ki jingjia bad ki jingpynthut jong ki bor ka mariang ki ju jia khah-khah hapoh Indonesia kum u jumai, ki jingbthei jong ki lum mih ding (volano) bad kumjuh ruh wat ki ‘erlangthari bad ki ‘eriong- ‘erngit kiba ju leit ban lynshop ia katei ka ri na ka por- sha ka por na ka jingdon jong ka ha ka bynta ba ki ju khot ka ‘Ring of Fire’.
Ka ‘Ring of Fire’, lane ka ‘Circum-Pacific Belt’ ka dei ka lynti kaba iasoh bad ka duriaw Pacific Ocean, ha kaba ki bor jong ka mariang kum u jumai bad ka jingbthei ki lum mih ding ka lah ban jia khah- khah.
Ka long ruh ka bynta jong ka pyrthei kaba kloi ban mad ia ki jingjia kum ka jingbthei ki lum mih ding bad kumba 90% u jumai ba khah- khah.
