Abu Dhabi, Nailur:
Ka Mia O’Brien, kaba dei ka khynnah pule aiñ jong ka ri Britain, kaba dang 23 snem ka rta, ka la shah rai pynrem ban shah set patok shi jingim ha Dubai, ha kaba, ka kmie jong ka, ka la ong ba katei ka jingbakla jongka ka long ‘ka kam khleh biej’. Watla katta, la ong ba ïa ka jingleh bakla jong katei ka khynnah pule aiñ, ym pat shym la pynpaw paidbah ïa mynta, hynrei katkum ki khubor na katei ka thaiñ, la kynnoh ba ka O’Brien ka la shah kem ryngkat bad u drok Cocaine uba 50 gram ha ka jingleit jongka sha Middle East ha u bnai Risaw jong u snem ba la leit. Katba, katei ka samla, ka la kyntait ban kam trai ïa utei u droks uba la lap na ka jingdon- jing-em jongka.
Ka United Arab Emirates (UAE) ka don ïa ki aiñ kiba pyrkhing bha bad ki jingpynshitom ïa ki kam runar ïa u drok, kynthup ïa ka jingshah set patok kaba slem bad ka kuna kaba heh. Ka jingshah set phatok baroh shi jingim jong u O’Brien ha Dubai ka mut 15-25 snem ha phatok, katkum ka aiñ jong ka UAE.
Ka kmie jongka, ka la sdang ïa ka jinglum pisa ban siew ïa ka bai leit jingleit, bai aiñ bad ki jinglut kiba ïadei bad ka jingleit jngoh ïa ka khun jongka ha patok. Hynrei ïa kane ka jingïakhih la weng noh da ka GoFundMe namar ba ka la pynkheiñ ïa ki kyndon jongki. Mynta ka la thaw pat sa ïa kawei ka Page ha ka rynsan Facebook ban pynmih pisa naka bynta kane ka kam.
Katei ka samla pule law na Merseyside, ka la shah rai pynrem ha u nongbishar ha u bnai Naitung. Ka kmie jongka, ka Danielle McKenna, ka la thoh ha ka jingthoh GoFundMe, kaba la weng noh mynta, ba ka khun jongka, ka shah set ha patok ha ka phang pdeng jong katei ka nongbah, ha kaba ki bahaïing jongka, ki la ïohi khatduh ïa ka, ha u bnai Risaw jong u snem 2024. “Kum ka kmie jongka, nga sngewsih shibun eh,” ka la thoh ha katei ka rynsan, ban pan jingkyrshan na ki paidbah bad ki paralok- parajor baroh.
