Kabul, Nailur:
Ka jingleh jong ki Taliban ïa ki kynthei kiba shah ktah ha ka jingkhie jumai ka la shah khanglad ha ki kyndon ba pyrkhing bha halor ka jinglong shynrang bad kynthei bad ki jingkhang jong ka kolshor, namar wat hadien 36 kynta jong ka jingkhie jumai, ka jingai jingïarap kam shym la ktah wat tang kawei ka kynthei, namar ki aiñ kiba ïadei bad ki kynthei ki khang ïa ka, kumba la ïathuh da ki lad pathai khubor.
Ka kyndon jong ka Taliban kaba ong “ym dei ban ïa-pyndei para sniehdoh bad ki shynrang ki bym don jingïadei” ka khang ïa ki nongpyllait im shynrang ban ïarap ïa ki kynthei, wat ha ki jingjia kiba shyrkhei kiba ap jingma ïa ka jingim jong ki kynthei. Kane ka la pynlong ïa ka jingpynslem ne jingbym ai jingsumar ïa ki kynthei kiba sahkut hapoh ki thliew hadien u jumai uba la lynshop ïa katei ka ri.
Kawei na kiba lait im, ka Aysha, kaba dang 19 snem ka rta, na Andarluckak, ha Kunar Province, ka la sngewsih ïa ka jingpyrkhing jong ki Taliban bad ki jingkhanglad jong ka rukom im ha katei ka ri, kiba pynlong ïa ki kynthei bad ki khynnah kynthei, kiba la mynsaw, ba kin shah ieh bad duh jingïarap khamtam ha ka por ba ki donkam ïa ka jingïarap kaba kyrkieh bad kiba bun kin shu ïap ei hajuh khlem da don nongïarap namar jong katei ka aiñ ba la wanrah da ki nongpyniaid jong katei ka ri naduh ki por ba rim.
Ka la batai ïa ka jinglong jingman kaba shyrkhei ha Afghanistan, kaba la nang pynsniew shuh shuh da ka jingkhynñiuh jumai ha ka 31 tarik u Nailar. Ka la ong ba bun ki kynthei ki la sahkut hapoh ki thliew ne khlem da sumar. “Ki don napdeng jong ki kiba mih snam, la pynkynriah noh sha shiliang”, la ong ka Aysha, katkum ka khubor jong ka New York Times.
“Ki la lum ïa ngi ha kawei ka thliew bad ki la klet noh ïa ngi,” ka la ong. Ym don ba tyrwa jingïarap ïa ki kynthei, kylli ïa kaei kaba ki donkam ne wat ban leit sha ki.
Ka jingkhang jong ka Taliban ïa ki kynthei ban pule doktor bad ban trei ha ki kam paidbah ka la pynlong ïa ka jingduna kaba jur bha jong ki nongtrei ka koit ka khiah kynthei. Kane ka buh jingeh ban ai jingsumar ïa ki kynthei ha ki jaka nongkyndong.
U Tahzeebullah Muhazeb, u nongtrei mon sngewbha shynrang uba la leit sha Mazar Dara, kaba don ruh ha Kunar Province, u la ong ba ki dkhot jong ka kynhun sumar ba dei tang ki shynrang hangtei ki artatien ban sei ïa ki kynthei napoh ki thliew jong ki jingtei kiba la twa. Ki kynthei kiba la shah teh bad kiba la mynsaw la iehnoh hapoh maw, ki ap ïa ki kynthei na kiwei pat ki shnong ban poi sha katei ka jaka bad ban tih ïa ki.
“Ka la long kumba ki kynthei kim lah ban iohi”, la ong u Muhazeb, 33 snem ka rta, bad u la bynrap, “La sumar nyngkong ia ki shynrang bad ki khynnah, hynrei ki kynthei ki la shong kyrpang, ki ap ia ka jingsumar.
