Gaza, Risaw 27 (UNI)
Kumba 57 ngut ki nongtrei ka UN Relief and Works Agency for Palestine Refugees in the Near East (UNRWA) ki la shah pynïap ha Gaza Strip hapdeng ka thma jong ka Israel bad ka Hamas, la ong u Commissioner-General ka UNRWA, u Philippe Lazzarini, ha ka Sngi Thohdieng.
“Man la ka sngi ka la nang kylla long ka sngi ba sngewsih ïa ka United Nations bad ka UNRWA na ka daw ba ki nongtrei jong kine ki shlem ki la nang shah pynïap. Haduh mynta, la lah ban pynthikna ba 57 ngut ki para ba ïatreilang ki la shah pynïap. Tang ha ka shi sngi, ki la don haduh 15 ngut kiba la shah pynïap,” la ong u Lazzarini haba kren sha ki lad pathai khubor.
Ha kajuh ka por, ka Special Coordinator for the Middle East Peace Process (UNSCO) ka UN, ka Lynne Elizabeth Hastings, ka la ong phra tylli ki trok kiba kit ïa ki lad ai jingïarap la phah sha Gaza Strip ha ka Sngi Thohdieng ban ai marbam mardih, umbam bad ki dawai dashin, hynrei ym pat lah ban leh eiei halor ka jingsam umphniang. Ka la ong ba ki la don 74 tylli ki trok kiba la poi ha Gaza Strip naduh ka 21 tarik Risaw ban sam ïa ki lad ai jingïarap.
“Ha kaba ïadei bad ka umphniang, ngim pat don satia ka jingïamynjur bad ka Israel la ngin lah ne em ban phah ïa ki trok kit umphniang,” la ong ka Hastings haba kren sha ki lad pathai khubor.
Ka thma hapdeng ka Israel bad ka Hamas ka la rung sha ka sngi kaba 21 ha ka Sngi Thohdieng bad haduh mynta, palat 1,400 ngut ki la shah pynïap ha Israel katba ki la don palat 7,000 ngut kiba la shah pynïap ha Gaza Strip kaba dei ka jaka kaba la pynïaid da ka Hamas.
Kane ka thma ka la sdang ha ka 7 tarik Risaw hadien ba ki lehnoh Hamas ki la rung na Gaza Strip sha Israel ban thombor bad pynïap bad rahbor ïa ki nongshong shnong bad ki bor pahara ka Israel. Na ka liang ka Israel pat ka la pynhiar kput da kaba ther da ki bom ïa ka Gaza Strip da ka jingthmu ban pynïap ïa ki nongïalam bad dkhot ka Hamas.
