Shillong, Rymphang 10
U Working President ka Khun Hynñiewtrep National Awakening Movement (KHNAM), Bah Thomas Passah u la ong ba lada ka seng ka ïoh ban synshar ha kane ka kynti, kata kan pyntikna ba ka bor ban ai ïa ka syrnot ‘riewlum ne syrnot ‘Schedule Tribe’ (ST) kan wan phai biang sha ka District Council.
“Ngi lap la bun-bun snem mynta ba ki don kiba pyndonkam bakla ïa ka thup kyrdan ‘Schedule Tribe’…phin kynmaw bha ba ha shuwa, ïa ka syrnot ST, la ai na ka liang ka District Council bad ym na ka Sorkar Jylla,” ong u Bah Passah hadien ka jingpyllait ïa 15 tylli ki mat jingkular jong ka seng na bynta ka ilekshon MDC ha ka Lah Sngi U Blei. Ha kawei ka liang, u la ong ba naduh ba shimti ka Sorkar ban aiti ïa kine ki syrnot ST, khamtam lyngba ka ‘Online’, ki la don shibun ki jingbym peit bniah, kaba wanrah pat ïa ka jingthurmur ne ka jingpyndonkam bakla ïa ka thup kyrdan ‘Schedule Tribe’.
“Lada ngi poi sha District Council, ngin pyntikna ba ka bor ban ai ïa ka syrnot ‘riewlum kan wan phai biang sha District Council khnang ba kan don ka jingpyrkhing kaba biang shuwa ban ai ïa ka syrnot ST sha kiba aplai,” ong u Bah Passah. Halor ka ‘Khasi Tribe Certificate’ na ka liang ka District Council, u la ong ba kane kam da long than kaba pyrkhing haduh katta-katta.
Haba phai sha ka jingpynrung kyrteng haba ïadei bad ka khyndew ka shyiap, u Bah Passah u la ong ba katkum ka ‘Para’ 3 jong ka Khyrnit ba 6, ka khyndew ka hap hapoh ka jingkhmih jong ka District Council.
“Hynrei ngi ïohi ba ka Sorkar Jylla ha u 1982, ka wanrah ïa kawei ka jingpynbna ba dei ban pynrung kyrteng noh ïa ka khyndew ka shyiap hapoh DC ophis. Ngi shim ba kane ka dei ka jingpynkheiñ lane kata ka jingknieh noh ïa ka bor jong ka District Council haba ïadei bad ka khyndew ka shyiap,” u la ong. Na ka liang une u nongïalam u la pyntikna ba ka seng kan ïasaid halor kane ba dei ban pynrung kyrteng noh ïa ka khyndew ka shyiap hapoh District Council khnang ban tip ïa u pud u sam jong ka District Council bad ban lait na ka jingïaknieh pud.
“Haba ka Sorkar Jylla ka kren halor ka jingïatyngkhuh pud, khamtam ha Block-I & II, ngi kiba la leit sha kine ki jaka, ngi tip ba ka jingïakajia pud ha Block I & II kam dei bad ka Sorkar Assam, hynrei bad ka Karbi Anglong Autonomous Council (KAAC)…kata ka dei ka jingshisha bad ki nongïalam shnong shato ruh kin ïathuh ïa kata hi,” u la ong. Haba ïadei bad ka ‘Land Act’ jong ka District Council kaba dang shen, u Bah Passah u la ong ba kam da long than kaba donkam naba mynta ki paidbah ki lah ban pynrung kyrteng hapoh DC ophis ne ha KHADC, hynrei ban pynrung kyrteng pat ha baroh ar ka long kumba ban beiñ ïa u paidbah. Haba kdew ba ka aiñ jong ka District Council ka long kaba kyllaiñ, u Working President u la ong ba lada ki nongshong shnong ki kwah pynrung kyrteng hapoh District Council, kin hap shim NOC shuwa na ka shnong, nangta sa ka dulir pynskhem na ka Hima, bad hadien kane kin hap rah pat sha KHADC.
“Ngi lap ba lyngba kane ka jingïaid lynti ba ki paidbah ki hap ban ïaid, ka don pat ka bamsap…ha kane ka aiñ, ka Council ka la buh pyrkhing ba ïa ka jaka hapoh ka 5000 sq.ft., ka shnong ka lah ban shim tang T.500 lane T.1000, ka Hima ka lah ban shim T.2000 bad ka KHADC la ka jong ka dor bad kaba heh tam ka pisa ba ka Council ka lah ban shim na bynta ka bai pynrung kyrteng kam dei than kaba khia haduh katta-katta. Hynrei ngi tip ïa ka jingshisha ba kiba bun ki shnong, ki Hima ki Raid kim ïaid katkum ka dor ba la buh da ka Council, ki ïaid la ka jong,” u la ong.
Shuh shuh u la ban jur ba dei ban pynduh noh ïa ka jingpynbna 1982 jong ka Sorkar Jylla bad ban pynrung kyrteng ïa ka khyndew ha District Council khnang ba kan ym syntuid sha kiwei pat ki briew kiba la shah mana ban thied jaka katkum ka ‘Land Transfer Act’.
