Shillong, Jymmang 28
Ka jingthmu ban thung ïa u coach bathymmai jong ka kynhun ïalehkai ka ri ka la nang ïai paw ha kaba mynta kiba bun ki la phai khmat sha u kapten barim u Gautam Gambhir ba un shimti ïa kane ka kam.
Kane ka la wan hadien ba ka Kolkata Knight Riders hapoh ka jingïalam u Gambhir kum u nong-aibuit, ka la lah ban pynurlong na ka bynta ban rah ïa ka nam lahduh ha ka sien kaba lai ha ka lympung IPL.
Ka tarik kaba khatduh ban aplai na ka bynta katei ka kam kaba thylli ban shimti kum u khlieh duh ka kynhun ïalehkai ka ri ka la kut ha ka Lah Sngi U Blei bad ka kyrteng u Gambhir ka la don ha ka thup kaba hakhlieh na ka bynta kane ka kynhun ïalehkai kriket.
Uwei na ki trai jong ka kynhun ïalehkai IPL bad uba don ka jingïadei kaba jan bad ki heh ka BCCI, u la pynpaw ba la dep ban pynbeit na ka bynta ka jingthung ïa u Gambhir kum u coach bathymmai bad shen yn sa pynbna ïa ka kyrteng jong u.
Ha kawei pat ka liang, u Secretary ka BCCI u Jay Shah dangshen u la kyntait halor ka jingthmu ban wanrah da uno-uno u rangïalehkai kriket barim ka Australia na ka bynta ban wan shimti kum u coach ka kynhun ïalehkai ka ri, hynrei u la ai ksai ba u ban mih bujli ha ka jaka u Rahul Dravid u lah ban dei napoh ri India.
