Shillong, Jymmang 30
Ka Bouncers Association of Meghalaya kum shi bynta ban rakhe ïa ka jingdap 20 snem, ka la rai ban pynlong da ka jingïamareh marathon kaba 7 kilometer ha kaba ka phang pdeng kan dei “Run for Environment – Run for a Cause”.
Ïa kane ka jingmareh thong yn pynlong ha ka 5 tarik u Jylliew ha ka por 7 baje mynstep. Kane ka jingïamareh kan sdang na lad Iewsier, Mawtnum, Ri-Bhoi bad pynkut hajan phalor jong ka skul Nepali Secondary School, Nong-poh, Ri-Bhoi District.
Ka jingthmu ban pynlong ïa kane ka jingmareh thong ka long ban rakhe ïa ka sngi burom kyrpang ïa ka Mei Mariang lane ka World Environment Day bad ban rakhe ruh ïa ka sngi burom kyrpang ïa ka jingïamareh lane ka Global Running Day. Kumjuh ka jingthmu ban pynlong ïa kane ka rynsan mareh kan long ruh ban pynsngewthuh lane pynshai paidbah ïa ka jingkordor jong ka jingdonkam ban burom bad ïada ïa ka mei mariang kum ki nongshong shnong bapher bapher bad ban phikir ïa ka khnang ba u bynriew un ïoh ïa ka jingkoit jingkhiah kaba bit ba biang. Te kumta ïa kane ka jingïamareh thong yn pynkut da ka jingthung ïa ki tynrai dieng ba bun jait ryngkat bad ki shyieng/tynrai sohpieng.
Namar kata, ka kynhun ka buh ka jingïawer paidbah katlah katïai ïa baroh ki ban ïashim bynta ha kane ka rynsan khnang ba kan long ka jingïarakhe sngi kyrpang ïa ka mei mariang bad ka jingïamareh kaba jop bad kaba sah kynmaw.
Ki nongjop ha kane ka jingïakob kin ïohpdiang ïa ki khusnam pisa, ki takma lem bad ki syrnod. Yn don ruh ka jingai khusnam ba kyrpang ïa ki nongshim bynta ba khynnah tam bad ba heh rta tam. Ïa ki jingtip ba bniah ki lah ban phone ha ki number 6909110529, 7005861828 & 8837201365. Kumjuh ruh ka jingshim kyrteng ïa ki nongshim bynta kan long ruh ha lane shwa ka 4 tarik Jylliew.
