Shillong, Jymmang 31
U Nishant Dev ha ka Sngi Thohdieng u la long uba nyngkong eh na ki rangïakura jong ka ri ban ïoh rung sha ka Paris Olympics hadien ba u la lah ban pynthikna ban ïoh rung sha ka semi final jong ka Boxing Olympic (qualifiers) kaba la long ha Bangkok.
U Dev, uba kham hashwa u la duh ïa ka lad ban ïoh rung sha ka Olympic, u la lah ban pynliem noh ïa u rangïakura na Moldova u Vasile Cebotari da 5-0 ha ka quarter final jong ka kyrdan ïakura kaba 71kg.
Kumba ka long mynta ka India ka la lah ban pynthikna saw ngut ki nongïakura ha kaba na ka liang ki kynthei ki long ka Nikhat Zareen (50kg), Preet Pawar (54kg), bad ka Lovlina Borgohain (75kg) ki la ioh rung sha Paris.
Haba phai sha kane ka jingiakhun, u Dev u la sdang ban ialehkai bha ha kane ka jingiakhun ha kaba u la ioh ban kura ia u rangiakura ka liang pyrshah. Watla u Cebotari u la ioh katto katne ban kura ha ka wat kaba ar bad baroh ar ngut ki nongiakura ki la thait bha haduh ka minit kaba khatduh. U Dev u la iai bteng ban kura tyngeh. U Cebotari u la shah khate poin na ka daw ba u lakura ia u Dev ha ka por ba u dang dem shapoh.
Ha kawei pat ka jingïakura, ka India ka la don jingkyrmen ha ka liang ki kynthei ha ka jingkhia kaba 60kg hynrei ka Ankushita Boro ka la shah rem noh da 2-3 ha ka ‘thei iakura na Sweden na Agnes Alexiusson ha ka quarter final. Watla ka Boro, kaba long ka lahduh barim jong ka pyrthei, ka la iakhun tyngeh hynrei ha kaba kut ka la mad ia ka jingshah rem ha katei ka nongïakura kaba la khur teng ia ka takma rnong ha ka European Games.
Ka Boro ka la sdang suki pa suki ban ialehkai bha hynrei ka la shah tam da 1-4. Wat la ka la pyrshang ban ïakhun tyngeh hynrei ka Alexiusson ha kaba kut ka la lah ban khur syndon ia ka jingjop.
