Shillong, Jylliew 02
Ka North East Cricket Development Council (NECDC) ha ka janmiet jong ka sngi Saitjaiñ ka la pynkup burom ïa ki rangïalehkai kiba la ïalehkai bha kumjuh ïa ki official bad ki kynhun kiba la ïakhun bha ha kane ka aïom jong ki lympung ka BCCI 2023-24.
Napdeng 38 tylli ki khusnam, 2 tyli ki khusnam ba heh ki dei na bynta ki ‘rangïalehkai ba tbit’ ne Best Players na ka North East Zone bad ïa kine ki khusnam la aiti sha u Kishan Lyngdoh jong ka Meghalaya bad ka Samayita Roy Prodhan jong ka Sikkim. Katba ka khusnam ‘Emerging Player’ ka la leit sha u Aloto Sumi ka Nagaland bad sha ka Sheikh Neha ka Manipur.
Kane kan dei ruh ka jingsam khusnam kaba lai jong ka NECDC bad ruh kaba la ïoh ban pynlong ïa ka jingïalang bah ka jong ka, ba la pynlong shwa ban sdang ïa ka prokram sam khusnam ba la pynlong ha State Convention Centre. Dei ruh ha kane ka jingïalang ba la shim ka rai ban pynkylla noh ïa ka kyrteng na ka Committee sha ka Council jong ka NECDC.
Ïa ka NECDC la seng ha u snem 2016 da ka jingthmu ban wanrah kawei ka jingmut bad ruh ban ïoh ka lad ban long dkhot ba pura jong ki hynriew tylli ki jylla ka thaiñ shatei lam mihngi bad ka BCCI, kata ka Arunachal Pradesh, Manipur, Meghalaya, Mizoram, Nagaland bad Sikkim. Kane ka la urlong ha u snem 2018 bad naduh nangne ka NECDC ka la lah ban ïalam lynti ban kyntiew ïa ka kam ïalehkai kriket hapoh ka thaiñ.
U Kishan u la lah shisha ban pynpaw ïa ka jingtbit ha kane ka aïom jong u snem 2023-24, namar u la tied 937 run ha ka lympung Ranji Trophy bad ha ka Vijay Hazare Trophy, bad ruh kum uba nyngkong na Meghalaya ban tied palat 200 run ha ka Ranji Trophy.
Katba ka Samayita ka la kamai 362 run ha ka lympung U-23 Women’s One Day bad T20 Trophy. Katba u Aloto pat u rangïalehkai ba dang khynnah, u la lah ban ïalehkai bha ha ka U-16 Vijay Merchant Trophy da kaba kamai 641 run bad khur 33 tylli ki wiket katba ka Neha pat ka la kamai 107 run bad khur saw wiket ha ka U-15 Girls One Day Trophy na ka bynta ka Manipur.
Nalor u Kishan, la don sa saw tylli ki khusnam na ka bynta ki rangïalehkai ka Meghalaya, ha kaba u nongkawang bol u Akash Kumar Choudhary u la khur ïa ka khusnam ‘Best Bowler (senior men)’ hadien ba u la khur 34 wiket ha ki 10 tylli ki jingïalehkai ha ka lympung Ranji Trophy. U Manish Sharma, ruh u nongkawang bol, u la jop ka nam Best Bowler (U-23 men) hadien ba u la ïoh khur 54 wiket ha ka lympung Col CK Nayudu Trophy bad State A Trophy, katba u Dipankar Baruah u la ïoh ka khusnam Best Wicketkeeper (U-19 men) hadien ba u la lah ban ïalehkai bha ha ka lympung Cooch Behar Trophy. Ka Debasmita Dutta ruh ka la shah pynkup burom na ka bynta ka jingkhur san wiket kaban dei ruh kaba nyngkong ïa ka kynhun North East Zone ha ka lympung Senior Women Inter Zonal Trophy.
