Shillong, Jylliew 02
Ka jingïalang kaba kyrkieh jong ka Executive Council ka Meghalaya State Olympic Association (MSOA) ba la ïakynduh da ka online ha ka 2 tarik Jylliew, ka la pynpaw ïa ka jingkyndit bad sngewsih halor ka jingkhlad noh u Stadhi Nongrum, 48 snem rta, na Laitryngew, uba long uwei na ki dkhot ka Executive Council, MSOA.
Ki dkhot ka MSOA ki phah ïa ka khubor sngewlem sha i kurim, ki khun, ki bahaïing baroh jong u Bah Stadhi Nongrum (bam kwai ha dwar U Blei).
Ki nongïalam ka MSOA ki la pynpaw ba ka jingkhlad noh kynsan jong utei u rangbah ka long shisha ka jingduh kaba khraw. Ki la kynmaw ruh ïa ki kam ba bha ki kam kiba radbah jong u Bah Stadhi Nongrum, naduh ki por ba u la shah jied kum u Executive Council Member ka MSOA, u la bat ruh ïa ka kyrdan kum u Secretary, Meghalaya Tennis Association. Ki la pynpaw ka jinglong kaba kloi jong une u rangbah ban kit ïa ki kam treimon sngewbha wat hapdeng ki kam kiba bun jong u kum u Assistant Executive Engineer, PWD, Meghalaya.
Ka Executive Council, MSOA bad ki dkhot baroh jong ka, ki phah ka khubor sngewlem sha ka ïing ka sem jong une u rangbah uba long ka nuksa ba bha ïa ki longdien baroh.
