Shillong, Jylliew 27
Ka Georgia ka la lah ban pynthikna ban jam sha ka pre-quarter final ha ka lympung ïalehkai Euro-pean Championship, hadien ba ka la lah ban pynliem ïa ka Portugal da 2-0 kol ha ka sngi Palei.
Kane ka nam jop ka la wan urlong lyngba u Khvicha Kvaratskhelia bad ka penalty na u Georges Mikautadze. Wat la ka la ïakhun pyrshah ïa ka Portugal kaba la pynmih khambun da ki rangïalehkai (reserve) na ka daw ba ka la ïoh rung lypa sha ka wat ka ban wan, hynrei kane ka jingjop ka la long kaba kham kongsan na ka bynta ka Georgia naduh ba ka la ïoh ïa ka jinglaitluid ha u snem 1991.
Ka jingïaid lynti ka Georgia ha ka Euro 2024 kam long kaba suk. Hadien ba ka la wan ha ka kyrdan basaw ha ka jingïaknieh jong ka Group-F ha kaba ka la shah rem ha ka Turkey da 1-3 kol, hynrei ka la wanphai da ka jingïakhiad mar 1-1 kol pyrshah ïa ka Czech Republic bad ka la lah ban wan ha ka kyrdan balai, kata hadien ïa ka Portugal bad ka Turkey kiba la wan ha ka kyrsan ba nyngkong bad ba-ar.
Te kumta ka Georgia kan ïakynduh pyrshah ïa ka Spain ha ka pre-quarter final ka ban long ha ka 1 tarik u Naitung. Ka Spain ka la long ka kynhun kaba la rah ïa ka Euro haduh lai sien.
Kiwei pat ki kynhun ki ban ïakhun ha ka pre-quarter final kin long hapdeng ka England pyrshah ïa ka Slovakia, ka Romania ïa ka Nether-lands bad ka Portugal ïa ka Slovenia.
Ha katei ka jingïakhun, ka Georgia ka la ïoh ban pynkhih jar tang mar ïasdang lyngba u Kvarats-khelia ha ka minit kaba 2 hadien ka jingbakla u rangïalehkai ka Portugal u Antonio Silva. U Cristiano Ronaldo, uba la long u rangïalehkai ba kynsai bad uba long u rangthep kol ba la kham rangbah tam ha ka Euro, um shym la lah ban pynurlong ha kane ka jingïakhun.
Ha ka kylla miet ka Georgia ka la ïoh syndon da ka penalty na ka daw ka jingbakla u Silva bad ïa kane la rai hadien ba la khmih bniah da ka VAR. Te kumta u Mikautadze um shym la pynlehnohei ïa kane ka kabu ksiar kaba u la ïoh.
Ka jingbym lah ban thep kol u Ronaldo, ka la pynlong ïa u ban ioh jing-sneng da ka yellow card bad hadien u la pyni ïa ka jingsngew bitar da kaba u la kynjat ïa u klong um hadien ba u la shah pynshong. Kane ka jingbym lah ban thep kol ka dei na ka daw ka jingïashan tyngeh u rangapkol ka Georgia u Giorgi Mamar-dashvili uba la lah ban pyllait na ka jingshah thep. Haba kut ki rangïalehkai, ka kynhun ki nongai jinghikai lem bad ki paidbah nongkyrshan ki la ïoh ban lehkmen lyngba kane ka jingjop.
Haba phai sha kawei pat ka jingïakhun kaba khatduh jong kane ka Group, ka Turkey ka la pynliem noh ïa kynhun ki khyndai ngut ki rangïalehkai ka Czech Republic da 2-1 kol.
Kane ka la wan lyngba u Hakan Calhanoglu (51) bad u Cenk Tosun (90+4), katba u Tomas Soucek (66) u la lah ban pynphai kylla shi kol na ka bynta ka Czech Republic. Ki ar ngut ki rangïalehkai ka Czech Republic ki long u Antonin Barak (20) bad u Tomas Chory (98+8).
