Shillong, Jylliew 27
Ka Thynroit SC ka la khur ïa ka jingjop kaba nyngkong ha kaba sdang ïa ka lympung ïalehkai U-20 Fourth Division 2024 ba la pynlong da ka Shillong Sports Association, hadien ba ka la lah ban pynjem khnap ïa ka Mawreng SC da 8-1 kol ha ka Sngi Palei ha SSA Stadium kaba ha First Ground, Polo.
Ïa kane ka lympung ïalehkai mynta ka aïom la wan ban plie da u President ka SSA u Bah Banteidor Lyngdoh, MLA ka Mawkynrew Constit-uency ha kaba la ïadon lang ki dkhot kane ka synjuk bad kiwei.
Ha kane ka jingïakhun ki rangïalehkai ka Thynroit ki la lah ban ïalehkai bha naduh kaba sdang ha kaba u Carrick Nongrum u la ioh ban thep ar kol ha ka minit kaba 56 & 58. Katba ïa kiwei pat ki kol la thep da u Lastingson Lawai (13), Silvestar Warlarpih (15), Arphrangstone Warlarpih (30), Cleofast Ksiar (66), Johnly Kharsahnoh (67) bad u Fairly Nong-spung (70).
Na ka liang ka Mawreng ka la ïoh ban pynphai kylla shi kol lyngba u John R. Nongkhlaw ha ka minit kaba 62.
Ha kane ka lympung ki don 30 tylli ki kynhun ha kaba la phiah ha ki hynriew tylli ki group. Ki kynhun kiba don ha ka Group-A ki long ka Thynroit SC, Mawreng SC, Madanryting SC, Lumpyngngad SC bad ka Umrynjah SC. Ha ka Group-B ki long ka Mawlyngad SC, Mawñianglah SC, Umiew Maw U Sam SC, New Challenger SC bad ka Mawpdang SC. Ha ka Group-C ki long ka Madan S&CC, Golflink SC, Nongthymmai Nongkynrih SC, Mawlynrei SC bad ka Umsohsun SC.
Ha ka Group-D ki long ka Them Rangshken A.C.C, Laitlulong SC, Laitkroh SC, Pynthorbah SC bad ka Mawklot SC. Ha ka Group-E ki kynthup ïa ka Nongkohlew SC, Risa Colony, Laitumkhrah SC, Lumkseh SC bad ka Riatsamthiah SC. Haba phai sha ka Group-F ki long ka Lummawbah SC, Mawkasiang SC, Maw -phlang SC, Pommura SC bad ka Diengpasoh SC.
Ha kane ka aïom la shah ban pynrung kyrteng haduh 5 ngut ki rangïalehkai ha kawei pa kawei ka kynhun kaba don haduh 25 ngut ki rangvalehkai. Te kumta tang ar tylli ki kynhun na kawei pa kawei ka group lem bad saw tylli ki kynhun kiba kynsai, kin ioh rung sha ka pre-quarter final.
Ha ka sngi Thohdieng ka Madan S&CC kan ïakhun pyrshah ïa ka Golflink SC ha ka por 1:45 janmiet ha First Ground, katba ka Mawlyngngad SC ïa ka Mawnianglah SC ha ka por 4 baje janmiet ha First Ground.
