Shillong, Jylliew 27
Ka Sorkar Jylla kan sa kyrshan jingïarap ïa i Kong Kmoiñ Wahlang ha kane ka jingleit sha Australia na ka bynta ban mihkhmat ïa ka Ri India sha ka 13th Pan Pacific Master Games 2024 ka ban long ha Gold Coast Queensland kaba ha Australia.
Kane ka jingpynthikna ka la wan hadien ba i la leit ïakynduh kyrpang ïa u Myntri Rangbah u Conrad K Sangma bad ruh ïa u Myntri ka tnat ïalehkai u Bah Shakliar Warjri hapoh ka kamra treikam jong u ha ka Sngi Palei.
I Kong Kmoiñ, i ba long na kiba la tymmen tam napoh ka Jylla ban ïashim bynta ha kiba bun ki jingïakop mareh la ka long hapoh ka Jylla ne wat ha kylleng jong ka ri, ila shah khot ha ka Pan India Masters Games Federation lyngba ka jinglah ka jong i ban ïashim bynta ha kwei na ka jingïakop napdeng ki nongshim bynta kiba ha ka rta kaba 75 snem shaneng kaba long ha Hyderabad mynta u snem.
Ïa i Kong Kmoiñ yn synran lang da u khlur nongmareh barim ka Jylla bad uba paw ha ri India, u Bah Biningstar Lyngkhoi uba dei na ka shnong Sakwang, Sourth West Khasi Hills.
