Shillong, Jylliew 27
Ka Meghalaya State Olympic Association (MSOA) kan ïaleh ban kunai na bynta ka Sorkar Jylla ban ym pynlut kham bun ka pisa na ka bynta ka 6th Meghalaya Games, kaba la thmu ban pynlong ha u Kyllalyngkot jong u snem ban wan ha West Jaiñtia Hills District.
Kumba ka paw ha ka 5th Meghalaya Games kaba la long ha Tura, West Garo Hills, ka Sorkar ka la pynlut haduh T.23 klur, kaba long haduh hynñiew shah na kaba la pynlut ha ka nongbah Shillong ha u u snem 2023.
“Ka jinglut ha Tura ka dei na ka daw ba ki duna bha ki hall ban ïalehkai bad dei na kata ka daw ba la hap ban wanrah da ki German Hangers namar kiba bun ki synjuk ïalehkai ki la dawa da ki jaka ïalehkai kiba heh,” la pynpaw u Working President ka MSOA u Bah John F. Kharshiing haba ïakren bad ki nongthoh khubor ha ka sngi Palei ha kaba u la ong ba ka jinglut jingsep kan duna bha ha West Jaiñtia Hills namar ki la biang lypa ki jaka ïalehkai.
U la ïathuh ruh ba ha Tura ym lah ban pynbiang ïa ki jaka sah na ka bynta ki nongïalehkai tang ha ki skul ha kaba la hap ban wai ïa ki ïingbasa nalor ba hap ban pynbiang ruh ïa ka bam na ka bynta ki nongïalehkai.
“Katei ka jingpynlut ka kynthup lang ruh ïa ka jingtei na ka bynta ka Synthetic Athletic Track kaba nyngkong eh ha Tura. La kynthup lang ruh ïa ka jingpynkhreh ïa ka PA Sangma Stadium na ka bynta ka sngi plie bad sngi pynkut. Shuh shuh ka Sorkar ka la pynïoh ruh katto katne ki tiar ïalehkai na ka bynta ki jingïalehkai,” u la bynrap.
Ha kawei pat ka liang u General Secretary ka MSOA u Bah Finely Pariat u la kyntu ïa baroh ki synjuk ïalehkai ba kim dei ban khmih lynti kham bun ki jingpynlut na ka sorkar Jylla namar ka dang dei la lympung ïalehkai hapoh ka Jylla. “Ka Meghalaya Games ka dangdei hapoh ka Jylla bad kam pat dei ka lympung National. Te kum ki synjuk ki dei ban sngewthuh ba kim dei ban dawa da ki jaka ïalehkai kiba heh.”
Dangshen kane ka synjuk ka la pynlong ka jingleit jurip ïa kiba bun ki jaka kynthup naduh ka Kiang Nangbah Stadium, Don Bosco Secondary School, Mihmyntdu, Bosco Pnar Salini Colony, Kiang Nangbah Government College, Amphitheatre kaba don ha Moolasyat, Jowai Polytechnic College, Kadar Daloi Law College, Tome Memorial Higher Secondary School, Mooralong, Chutwakhu Indoor Stadium, Jowai Public School, Khimmusniang Indoor stadium bad madan Jrisalein.
Nalorkata la pynlong ka jingjurip ruh ïa ka Chilliang Raij Community Hall, Dulong Indoor Hall, Tpep-pale Community Hall, Sein Raij Indoor Hall, Lion Sports Club Hall, Jowai Presbyterian LP School, Govt UP School Chutwakhu, Govt Girls bad Govt. Boys HS. School, Kiang Nangbah Hr Secondary, St. Mary Mazzaerello Higher Secon-dary, Marian Hills Hr Sec School, Ladthadlaboh Indoor Hall bad MDC Hostel.
Ha kane ka sien kaba hynriew, la khmih lynti ban kynthup haduh 25 tylli ki jingïalehkai bapher bapher nalor ki jingïalehkai tynrai.
