Shillong, Jylliew 28
Ka Mumbai City FC ka la pynbna ba u Lallianzuala Chhangte, uba long uwei na ki rangïalehkai ba kynsai jong ka klob, u la pynjlan ïa ka kontrak ka ban kut haduh ka aïom ïalehkai 2026-27.
Une u rangïalehkai shapdeng, u la long uba paw naduh ba u la ïasoh sha kane ka kynhun ha u Kyllalyngkot jong u snem 2022. U long ruh uba la paw ym tang ha ka klob hynrei na ka bynta ka kynhun ïalehkai ka ri kumjuh. Ha ka Indian Super League (ISL) 2023-24, u Chhangte u la lah ban thep haduh 10 kol bad ïarap pynbuh bol 6 kol, ha kaba u la long rangïalehkai ba nyngkong ha ka lympung ISL ban noh synñiang 15 kol ha ar tylli ki aïom.
Nalor ba la ïadon bynta ban rah nam lahduh ha ka ISL 2022-23, u Chhangte u la long u rangïalehkai ba kynsai ha kane ka aïom, ha kaba u la ïoh ban thep kol ha ki jingïakhun kiba kham heh ha ka semi final jong ka ISL 2023-24 bad u la lah ban ïarap ruh ïa ka Mumbai City FC ban jop ha ka ISL Cup.
U Chhangte u la khur ruh ïa ka khusnam Golden Ball ha ka ISL 2022-23 bad ka Golden Boot ha ka Durand Cup 2022. U la lah ban kynjoh ïa ka thong da kaba thep haduh 8 kol ha ka ISL, ha kaba u la long uba ar napdeng ki rangïalehkai ka ri kata hadien ïa u Sunil Chhetri ban khur ïa ka rekod ha ka jingnoh synñiang ha kaba thep kol ïa ki kynhun liang pyrshah ha ka ISL.
Ïa une u rangïalehkai ba dang 27 snem ka rta ba la ju tip kum u “Mizo Flash”, u la ïadon bynta ha ka AFC Champions League 2022, ha kaba ka Mumbai City ka la long ka klob kaba nynkong eh napoh ka ri ban khur ïa ka jingjop bad ban wan ha ka kyrdan ba-ar ha ka jingïalehkai group.
Kumta u Chhangte un ïai bteng kum u rangïalehkai ha ka Mumbai Football Arena bad lyngba ka jingïalehkai bha u lah ban long uba kynsai na ka bynta ka Mumbai City ha ki aïom ïalehkai ki ban dang wan. U Chhangte u la long ka nuksa na ka bynta ki rangïalehkai kiba dangkhynnah bad kiba don sap, kiba dangdonkam ban nangsan ha ka kam ïalehkai.
“Ngam don jingartatien ba ngan dangïai bteng na ka bynta ka Mumbai City FC ha ka aïom ka ban wan. Ki nongkyrshan kin long kiba bun bad ngi ïalong kum shi ïing hapoh ka klob. Nga sngew ba ngan ainguh ia U Blei uba la pynlah ïa nga ban siew kylliang da ka jingïeid ïa ki paidbah nongkyrshan da kaba pynurlong ban khur ïa ki trophy nam lahduh. Nga kyrmen ba ngan dangïai bteng ban ïalehkai bha na ka bynta ka Mumbai City FC,” la bynrap u Chhangte ha ka kyrwoh.
Ha kawei pat ka liang u Coach ka Mumbai u Petr Kratky u la ong, “U Chhangte u long uba lah ban ïalehkai na ka bynta ka klob bad nga sngewkmen ba u dangïai sah bad kane ka kynhun.”
