Shillong, Jylliew 28
Ka All Meghalaya Soccer Futsal Association ha ki taïew ba la dep ka la phah ïa ka kynhun ïalehkai sha Bangladesh ban leit ïashim bynta ha ka 1st Bangabandhu Indo-Bangla Futsal Cup 2024 kaba la long ha Dhaka.
Ha kane ka jingïalehkai 5 ngut ki rangïalehkai jong ka Jylla ki la leit ban mihkhmat ïa ka ri India. Kine ki kynthup ïa u Silvanus Diengngan, Rahul T Sangma, Mandeland Hahshah, Shaniahskhem L Mawshillong, bad u Abandon Nongtnger bad u team maneger uba dei ruh u Coach u Christopher Hashah.
Ïa kane ka jingïalehkai la pynlong da ka Bangladesh Soccer Futsal Association. Ha kane ka jingïalehkai ka India ka la ïoh ban thep 4 kol bad ka Bangladesh ka la ïoh ban thep 6 kol bad rah artad ïa ka nam lahduh.
Ka jingïalehkai hapdeng kine ar tylli ki ri ka long kaba itynnad haduh katta katta bad shongshit. Na la liang u President ka All Meghalaya Soccer Futsal Association u Bah Samuel Hashah u la ïathuh ba wat la ki samla ïalehkai ka Jylla kim shym la lah ban ïoh ïa ka jingjop, pynban kane ka kynhun kan sa leit ban mihkhmat sa sha ka Asian Futsal Championship 2024, ka ban sa long ha ka 28 haduh 30 tarik mynta u bnai ha Pokhara kaba ha Nepal.
