Shillong, Naitung 19
Ka 3rd Sohra International Half Marathon 2024 kan long ha ka 21 tarik u Nailur mynta u snem ha Sohra ha kaba la khmih lynti ïa ka jingwan ïashim bynta kham bun na kylleng ki ri ka pyrthei, kumjuh napoh ri India bad na kane ka Jylla.
Ïa kane ka jingïakop mareh kaba hap hapoh ka jingkhmih da ka Athletics Federation of India, yn pynlong da ka Meghalaya Athletics Association, ka Meghalaya State Olympic Association ha ryngkat ka jingkyrshan lang da ka tnat ïalehkai jong ka Sorkar Jylla ka ban pynlut haduh T. 2.3 klur tam.
Ki kyrdan mareh ha kane ka jingïakop ki kynthup ïa ka 21K Elite Open (18 snem shaneng), 21K Open (18 snem shaneng), 10K Open (40 snem haduh hapoh 50 snem), 10K Open (50 snem haduh hapoh 60 snem),10K Open (50 snem haduh 60 snem), bad ka 5K Run for Fund jong ki shynrang bad kynthei.
Ka bai pynrung kyrteng na ka bynta ka 21K Elite Open (18 snem shaneng) bad ka 21K Open (18 snem shaneng) ka long T. 1000. Na ka bynta ka 10K Open (40 snem haduh 50 snem) bad 10K Open (50snem haduh 60snem) kan long T.200. Hynrei ym don bai pynrung kyrteng na ka bynta kiba ïashim bynta ha ka jingmareh 5K.
Haba ïakren bad ki nongthoh khubor ha ka Sngi Thohdieng, u Working President ka MSOA, u Bah John F. Kharshiing u la pyntip ka tarik khatduh ban pynrung kyrteng ban ïashim bynta kan long ha ka 10 tarik u Nailur.
Ha kawei pat ka liang, u Director ka tnat ïalehkai u D.D Shira (MCS) u la pyntip ba ka tnat jngohkai pyrthei nalor kiwei pat ki tnat treikam kin ïadon bynta lang mynta u snem. “Ka tnat ka la mang pisa T. 2.3 klur tyngka na ka bynta ka Sohra International Half Mara-thon mynta u snem.”
Shuh shuh u la ïathuh ba yn thung ïa ki ophisar na ki district ki ban ïadon bynta ha ki committee bapher bapher na ka bynta ban pynlong ïa kane ka prokram kaab jop.
U General Secretary ka MSOA, u Bah Finely Pariat u la pyntip ba ka lynti ïaid na ka bynta kane ka jingïakop mareh kan long kumjuh kumba long mynshem snem. “Kane ka jingïamareh kan sdang na Laitsohpliah (6km shakhmat na ka jingkieng Mawkdok) bad kan kut ha Mawsmai.”
U Bah Pariat u la pyntip ba ka khusnam na ka bynta ki nongjop ha ka 21k Elite Open Category jong kiba 18 snem shaneng kan long naduh T.1 lak sha ka T.1.50 lak. Katkum ka jingïathuh jong u, ka khusnam baroh na ka bynta kane ka jingïakop mynta u snem ka long haduh T. 14.60 lak tyngka.
U la pyntip ba ki la rai ruh ban pynrung shuh shuh ïa ki kyrdan hadien ka jingkyrpad na ki nongmareh na ka thaiñ kiba kynthup ïa ka kyrdan 40 haduh hapoh 50 snem bad ka jingïamareh 10k marathon na ka bynta ka kyrdan 60 snem shaneng.
Utei u General Secretary ka MSOA u la ong ba ka 21k bad 10k ka dei ka jingïalehkai kaba plie lad na ka bynta ki nongïalehkai marathon napoh ka Jylla, napoh ka ri bad kiba nabar ri. Te kumta ki lah ban pynrung kyrteng bad ban ïashim bynta ha ki ar tylli ki jingïalehkai. U la pyntip ba ïa ki T-shirt bad ki Bib Number yn sa sam ha ka 19 bad 20 tarik u Nailur ha JN Stadium, Polo. “Kin don ki khusnam kyrpang na ka bynta ki nongmareh kiba la 50 snem shaneng kiba lah ban pyndep ïa ka ka jingïamareh 21K,” la bynrap u Bah Pariat.
U la ïathuh ba ka jingpynrung kyrteng na ka bynta Run for Fun ka long lyngba ka online & offline. Kane ka jingpynrung kyrteng kan long ha shlem treikam jong ka MSOA kaba don ha JN Stadium bad ha Sohra Shop hajan Petrol Pump, Lad Thanad.
