Shillong, Naitung 21
Ka Lumpyngngad Sports Club, ka Mawlynrei Sports Club, ka Them Rangshken ACC bad ka Pynthorbah Sports Club ki la ïoh jingjop ha ki jingïalehkai jong ka lympung SSA 4th Division 2024 kiba la long ha ka Sngi Saitjaiñ ha madan Polo.
Haba phai sha ka jingïalehkai kaba nyngkong jong kane ka lympung, kaba la buh ha ka por 11.30 mynstep, ka rai jop ka la leit sha ka Lumpyngngad SC da 3-0 kol bad ki 3 point pura hadien ka jingbym lah jong ka Mawreng Sports Club ban wan poi sha madan na ka bynta kane ka jingïalehkai.
Haba phai sha ka jingïalehkai kaba ar ba la pynlong ha ka por 1:45 mynsngi, ha MFA Ground, ka Mawlynrei SC ka la lah ban pynliem noh ïa ka Golflink Sports Club da 3-1 kol. Ïa ki kol jong ka Mawlynrei la ïoh ban thep da u Banjop Thabah ha ka minit ba 35+2, u Banteilang Sohlang ha ka minit ba 45 bad u Banjop Dohling ha ka minit ba 70+5. Katba ïa ka shi kol jong ka Golflink SC pat la thep da u Ribanshan Wahlang ha ka minit ba 3.
Haba phai sha ka jingïalehkai kaba lai hapdeng ka Mawklot Sports Club pyrshah ïa ka Them Rangshken ACC kaba la long ha ka por 4 baje janmiet ha madan MFA, ka Them Rangshken ka la lah ban pynliem noh da 5-0 kol ïa ka Mawklot SC bad ïa kine ki kol ka Rangshken la thep da u Stambok Kurbah ha ka minit ba 6 bad 54, u Rostar Thabah ha ka minit ba 18, u Gilbert Kurbah ha ka minit ba 20 bad u Ksanbor Warjri ha ka minit ba 59.
Haba phai sha ka jingïalehkai kaba khatduh jong kane ka sngi, kaba la long hi ha ka por 4 baje janmiet ha madan SSA, ka jingïakhun hapdeng ka Pynthorbah SC pyrshah ïa ka Laitlulong Sports Club ka la long kaba itynnad bad kaba ïakhaid bha.
Ha kane ka jingïakhun, ha kaba kut, ka Pynthorbah SC ka la jop noh da 3-2 kol ïa ka Laitlulong SC. Ïa ki kol ka Pynthorbah la thep da u Rishan Nonghyndah ha ka minit ba 7, u Jwier Kharkongor ha ka minit ba 10 bad u Raymond Kharkongor ha ka minit ba 34. Katba ïa ka kol kaba nyngkong kaba ka Laitlulong ka la ïoh ka la long ha ka minit kaba 41 hadien ba u Gilbert Kurbah ka Pynthor u la kum thep bakla sha la ka jong ka kol bad ïa kawei pat ka kol la thep da u Ontonas Nongsiej ha ka minit ba 63.
