Shillong, Naitung 21
Ki jingïalehkai ha ka sngi sdang ïa ka lympung Meghalaya Youth League 2024 kaba la pynlong ha kylleng ki district ha ka Sngi Saitjaiñ ka la long kaba jop.
Haba phai sha ka Zone B, kaba kynthup ïa ka Jaiñtia Hills, la ïoh ban sakhi ïa ki jingïalehkai kiba itynnad ha ka kyrdan U-14 bad U-16.
Ha ka kyrdan U-14, ka Saipung Block Sports Association ka la jop da 2-1 kol ïa ka East Jaiñtia District Football Association katba haba phai pat sha ka kyrdan U-16, ka East Jaiñtia Hills ka la jop da 2-1 kol pyrshah ïa ka Saipung.
Ha kiwei pat ki jingïalehkai, ka Amlarem Block Sports Assocition ka la khur jingjop ha baroh ar ki kyrdan kata ha ka U-14 bad U-16, da kaba pynliem noh ïa ka Laskeiñ Block Sports Associa-tion da 4-1 kol bad 1-0 kol. U Emon Mylliem u la khyrwit ïa ka hat-trick ha ka kyrdan U-14 na ka bynta ka Amlarem.
Haba phai pat sha ka Zone A, kaba kynthup ïa ka Garo Hills, la sakhi tang kawei ka jingïalehkai ha ka kyrdan U-14, ha kaba ka Tura District Football Association ka la pynliem da 13-0 kol ïa ka Bagh-mara District Football Associa-tion.
Ha ka Zone C ba la pynlong ha Shillong, ka Shillong Sports Association ka la shah pynliem noh ha ka Ri-Bhoi District Sports Association ha baroh ar tylli ki kyrdan kata ka U-14 bad U-16. Ha ka U-14 ka Ri-Bhoi ka la jop da 3-0 kol bad ha ka U-16 ka la jop da 3-2 kol.
Kawei pat ka jingïalehkai jong ka Zone C ba la buh ban pynlong ha Jirang kata ha ka U-16, hapdeng ka Western Ri-Bhoi Sports Association pyrshah ïa ka Riwar Mihngi Football Association, ym shym la lah shuh ban pynlong namar ka jingther jong u slap ba jur bad ha kaba kut la shu ai noh mar shi point.
Ka Zone D ha kaba ki don haduh 6 tylli ki kynhun, bad ha kane ka sngi sdang ruh la ïoh ban pynlong lai tylli ki jingïalehkai. Ka Nongstoin District Sports Association, Mawkyrwat District Sports Association bad Pyndeng-umiong District Sports Associa-tion ki la khur jingjop ha ka U-14.
Ka Nongstoiñ ka la jop da 7-0 kol ïa ka Eastern Border Sports Association, ka Mawkyrwat ka la pynliem noh ïa ka Tyrsad Area Sports Association da 3-0 kol bad ka Pyndengumiong ka la jop da 5-0 kol pyrshah ïa ka Mawshynrut Sports Association.
Ha ka kyrdan U-16, ka Nongstoiñ ka la jop ïa ka Eastern Border da 6-1 kol, ka Mawkyrwat ka la pynliem ïa ka Tyrsad da 1-0 kol. Katba ka jingïalehkai hapdeng ka Pyndengumiong pyrshah ïa ka Mawshynrut ba la long ha madan Dommawlum ka la kut ha ka jingïakhaid da mar 3 kol.
Tang ha kane ka sngi sdang ïa kane ka lympung, la sakhi ïa ka jingthep haduh 62 tylli ki kol da ki 50 ngut ki khynnah ïalehkai. Ka round kaba ar jong kane ka lympung kan long pat ha ka 27 tarik mynta u bnai.
