Shillong, Naitung 21
Ka lympung ïakob jngi kaba ar sngi ba la pynlong ha pung Crinoline Swimming Pool, ha nongbah Shillong ka la poi noh sha kaba kut ha ka Sngi Saitjaiñ. Ha kane ka lympung baroh kiba la wan ïashim bynta ki long haduh 143 ngut na kylleng ki district jong ka jylla.
Ïa kane ka lympung ïakob jngi ba la tip kum ka 17th State Aquatic Championship 2024, la pynlong da ka Meghalaya Swimming Association (MSA).
Ha kane ka kynti ka nongbah Shillong ka la lah ba kan sei kham bun ki nongwan ïashim bynta kata haduh 86 ngut, bud pat sa ka Shella 23 ngut, Mawkyrwat 23 ngut, Garo Hills 8 ngut, East Jaiñtia 1, katba kiwei pat ki district bad association ki la sei 2 ngut. Haba kheiñ kyllum ki nongwan ïashim bynta baroh ki long 143 ngut, kata 98 ngut ki shynrang bad 45 ngut ki kynthei.
Ha kaba kut jong kane ka jingïakhun, ka MSA ka la lah ba kan sam ïa ki takma bad kumjuh ïa ki syrnod (certificate) ïashim bynta sha ki nongwan ïashim bynta sha kane ka lympung.
Nalor kane, ha ka sngi kut ka MSA ka la ïoh ruh ban sam ïa ka khusnam ‘rang bad ‘thei nongjngi ba kynsai ne Best Swimmer, bad haba phai sha ka Sub-Junior kata 10 haduh 12 snem, ïa ka nam la ïoh da u Keenan Momin hadien ba u la ïoh ban khur 4 tylli ki takma ksiar bad 1 ka takma rupa bad na ka liang ki kynthei ïa kane ka nam la rah da ka Anisha Phanbuh hadien ba ka la ïoh khur 2 tylli ki takma ksiar.
Ha ka kyrdan Junior 12 haduh 14 snem, ïa ka nam kum u nongjngi ba kynsai la ïoh rah da u Meiaipynsan L Tron hadien ba u la ïoh ban khur 5 tylli ki takma ksiar bad 2 tylli ki takma rupa, bad na ka liang ki kynthei ïa kane ka nam la ïoh ban rah da ka Tvisha hadien ba ka la ïoh ban khur 3 tylli ki takma ksiar.
Ha kawei ka kyrdan Junior kata 15 haduh 17 snem, u Cleric Jayden Wanniang u la ïoh ban khur 4 tylli ki takma ksiar kaba la biang pura ïa u ban rah ïa ka nam nongjngi ba kynsai na kane ka thup bad na ka liang ki kynthei, ïa kane ka nam la rah da ka Ilarisuk Youroi hadien ba ka la ïoh ban khur haduh 5 tylli ki takma ksiar.
Katba ha ka kyrdan ïakhun jong ki Senior pat, u Banpyn-shngain Syngwan u la rah ïa kane ka nam hadien ba u la ïoh ban khur 4 tylli ki takma ksiar bad kawei ka takma rnong bad na ka liang ki kynthei ka Alyssa M Lyngdoh kala ïoh ban khur haduh 3 tylli ki takma ksiar bad mar kawei ka takma rupa bad rnong ban rah ïa ka nam nongjngi ba kynsai.
Lyngba kane ka lympung ïakob jngi ba arsngi ba ka MSA mynta kan ïoh ban jied ïa la ki nongïalehkai ki ban leit mihkhmat ïa ka jylla sha ki National Swimming Competition kiban long ha Odisha bad Mangalore ha u bnai Nailar u ban wan.
