Shillong, Naitung 21
Ka Nongdawah Sports Club ka la ïoh rah ïa ka nam lahduh ha ka First Division jong ka lympung 12th Mawryngkneng Greater Football League 2023-2024 hadien ba ka la pynliem noh ïa ka Pdengshnong Sports Club ha ka jingïalehkai final kaba la long ha Mawryngkneng ha ka Sngi Saitjaiñ. Haba phai sha ka jingïalehkai final, ka Nongdawah SC ka la lah ban pynliem noh ïa ka Pdengshnong SC da 2-0 kol ha ka jingïalehkai kaba itynnad bad kaba ïakhaid khamtam lei lyngba ka jingwan ai jingkyrshan ki ‘riew ieit phutbol.
Ha shuwa ban sdang ïa ka final, la pynlong ïa ka jingïalang lyngkot kaba la pynïaid da u Chairman jong ka Tournament Committee u Bah Shiningstar Kharbihkhiew bad la ïoh ïa ka tem ka put nyngkong na ka Meghalaya Home Guard Pipe Band bad bud sa ka Drill na ki artylli ki skul kata ka RMSA Mawryngkneng bad ka MHSS Mawryngkneng bad la ïoh ïa ka jingkren nyngkong na u President ka Mawryngkneng Cultural and Sport Club Bah Kesmanfull Nongpluh uba la batai ïa ka jingïaid lynti ka League, ha kaba la ïoh pynkut noh ïa ka 2nd Division bad ha kane ka sngi pat la ïoh ban pynkut ïa ka 1st Division. Ha kane ka sngi la ïoh ruh ïa ka jingkren na u Sordar Shnong Mawryngkneng Bah Peter Lawai, uba la kyrkhu kyrdoh bad ai mynsiem ïa ka MCSC bad ha kane ka sngi u Symbud Myntri Rangbah ka jylla u Bah Sniawbhalang Dkhar u la ïadon lang kum u kongsan bad ha kaba u la ong ba um poi pyrkhat ba tang ha kum kane ka lympung kaba rit ruh ba ki paidbah kin wan ban pyndap ïa ka madan bad ai jingkyrshan.
Nalor ka nam lahduh, ha kane ka lympung la ïoh ruh ban sam ïa ki khusnam shimet, ha kaba ïa ka nam Best Goalkeeper la ïoh da u Donbok L Dkhar jong ka Pdengshnong Sport Club, ka nam Best Defender la ïoh da u Rishot Sari jong ka Nongdawah Sport Club, ka nam Best Midfielder la ïoh da u Bannehskhem Mynsong jong ka Pdeng-shnong Sport Club, ka nam Top Scorer la ïoh da u Debin Nongspung jong ka Nongdawah Sport Club uba la thep 6 tylli ki kol bad ïa ka nam Emerging Player la ïoh da u Bamon Myrboh jong ka Pdengshnong Sport Club.
