Shillong, Naitung 22
Ka kynhun ïalehkai ka Jylla (Junior) ka la shah pynngat bad ki kynhun kiba khlaiñ bor na ka bynta ka lympung ïalehkai Junior Boy’s National Football Championship (Tier 1) jong ka Dr. BC Roy Trophy.
Ha kane ka lympung ïalehkai ka ban long ha Narainpur, Chhattisgarh ka ban sdang naduh 27 tarik mynta u bnai haduh 12 tarik u Nailar mynta u snem, ka Meghalaya hapoh ka jingïalam u Bah Lekini Suting kum u coach, ka la don ha ka Group-C ha kaba la kynthup lang ïa ka Punjab, Chandigarh bad ka Karnataka.
Kane ka kynhun ïalehkai ka Jylla kan mih mynta ka sngi Ba-ar na kane ka nongbah bad kan pynkhreh ïa ka jingïakhun ba nyngkong pyrshah ïa ka Chandigarh ha ka 28 tarik, kumjuh ïa ka Punjab ha ka 30 tarik bad ïa ka Karnataka ha ka 1 tarik u Nailar.
Kumba ka paw ha kane ka lympung ki don 16 tylli ki kynhun ha kaba la phiah ha ki saw tylli ki group bad ka Uttar Pradesh ka long ka lahduh ha u snem ba la lah. Ki kynhun kiba don ha ka Group-A ki long ka Uttar Pradesh, Mizoram, SAI & Odisha. Group-B ki kynthup ïa ka Jharkhand, Goa, Maharashtra & Delhi. Group-D ki long ka West Bengal, Chhattisgarh, Kerala & Tamil Nadu.
Halor kane ka jingleit ïashim bynta, na ka liang ka Meghalaya Football Association (MFA) ka la ai khublei kitbok ïa katei ka kynhun ba kan ïalehkai ha katei ka lympung bad kyrmen ba kan lah ha ka ban ïoh kheit ïa u soh ka jingjop.
