Jowai, Naitung 22
Ka Luti Tuber Ïalong SC, Nonglatem bad ka Mulang Ïalong ki la ïoh jingjop ha ka 4th Adelbert Laloo Memorial Trophy-3rd Division Football Tournament.
Ha kane ka jingïakhun kaba la long ha ka Lah Sngi U Blei ha madan Kiang Nangbah Stadium, Jowai, ka Luti Tuber Ïalong ka la pynliem ïa ka Loomiongkjam lyngba ka shi kol ba la thep da u Francis Pale (37).
Ha ka jingïakhun kaba bud ka SC SC Nonglatem ka la pynliem noh ïa ka Dongnein Mokaswan da 2-0 kol. Ïa kine la thep da u P. Langshiang ha ka minit kaba 65 bad u Obidien Pyrtuh ha ka minit kaba 67.
Ha kawei pat ka jingïalehkai hapdeng ka Phramer pyrshah ïa ka Khliehshnong Ïalong ki la ïasam mar shi point hadien ba ki la ïakhaid mar 1-1 kol. Tang mar ïasdang ka Phramer ka la pynkhih jar nyngkong eh lyngba u Rashmiki Suchiang ha ka minit kaba 8, hynrei ka Khliehshnong ka la lah ban pynphai kylla lyngba u S. Pale ha ka minit kaba 20.
Ha ka jingïalehkai kaba khatduh jong kane ka sngi ka Mulang Ïalong ka la pynliem ïa ka Saindur Mihmyntdu da 2-0 kol. Ïa kine la thep da u Poisuk Dhar (55) bad u Richard Dhar (56).
