Shillong, Naitung 22
Kan dei ka sien kaba nyngkong eh ba ka Jylla ka la lah ban sei da ar ngut ki coach kiba dei shipara na ka bynta ban ïadon bynta ha ka Paris Olympics 2024 ka ban sdang naduh 26 tarik mynta u bnai bad kut ha ka 11 tarik u Nailar.
U Torak Kharpran uba la mih ha ka Lah Sngi U Blei ban leit sha Paris, u la long uwei napdeng ki coach ban ïalam ïa ka kynhun ki nongïakura (boxing) jong ka ri India sha katei ka jingïakura ka ban sdang naduh 27 tarik mynta u bnai bad kut ha ka 10 tarik u Nailar.
Kaba sngewtynnad hangne ka long ba u hynmen jong u Torak, u Bah Larry Kharpran uba long u coach ka Jylla, u la shah thung ha ka Boxing Federation of India (BFI) kum u nongpeit pyrman (observer) na ka bynta ki jingïalehkai boxing jong ka India ha Paris.
Kane ka long ka sien kaba ar ïa u Torak ba un ïadon bynta kum uwei na ki coach hapoh ka kynhun ïakura jong ka ri bad kaba nyngkong eh ka dei ha ka 19th Asian Games 2023 kaba ha long ha China.
Kumba ka paw ka Jylla ka la lah ban sei tang ar ngut ki nongïalehkai sha ka Asian Games ha ki snem kiba mynshwa kata ka Kong Matsiewdor War Nongbri (Archery) bad u Bah Damang Syngkon (Karate), hynrei haduh mynta kam shym la lah ban sei shuh ïa ki nongïalehkai kiba kynsai. Pynban kaba sngewtynnad mynta u snem ka long ba utei u coach uba la don ha ka shem ai jingai jinghikai jong ka Sports Authority of India (SAI) u la shah jied na ka bynta ban long kum uwei na ki coach jong ka kynhun ïakura sha katei ka lympung ka ban long ha Paris.
Kumta ka Sorkar Jylla ka la buh ïa ka thong na ka bynta ban sei ïa ki nongïalehkai ki ban paw haduh ka Olympic bad bteng biang ïa ka wat kaba ar na ka bynta ka STAR Programme ka ban ïit bniah lyngba ki tiar ki tar ka juk mynta bad ban ithuh ïa ki sap ba kyrpang jong ki khynnah kiba don ha kylleng ka Jylla.
“Ngi la sdang ïa ka STAR Programme da ka jingthmu ban sei ïa ki nongïalehkai ki ban paw haduh ka Olympic namar kumba phi ïatip ba ka ri India ka la thmu ban pynlong ïa ka Olympic ha u 2036,” la pynpaw u Myntri ka tnat ïalehkai u Bah Shakliar Warjri dangshen ha kawei na ka jingïalang kaba la long ha ka taïew ba la lah.
“Ngi la pynlong bun tylli ki jingïalang bad ki ophisar ka tnat ïalehkai ha kaba ngi la rai ban pynlong ïa ka Sports Conference hapoh ka Jylla jong ngi bad ngin khot snewbha ïa ki Myntri ba dei khmih ïa ki tnat ïalehkai jong ki jylla ka thaiñ shatei lammihngi na ka bynta ban ïamir jingmut lang bad ruh ban wanrah ïa ki jingai jingmut kumno ban lah ha ka ban sei ïa ki nongïalehkai napoh ka Jylla ki ban ïoh ban shim bynta ha ka Olympic ka ban long ha snem 2036 ha ri India,” u la bynrap da kaba khmih lynti ba katei ka jingthmu kan urlong.
