Jowai, Naitung 23
Ka hat-trick ba la ïoh da u Pynshngaiñ Kyndait ka la biang pura ïa ka Lumchyrmang Mihmyntdu ban pynliem noh ïa ka Nangbah Pohshnong da 7-0 kol ha ka lympung ïalehkai “4th U Adelbert Laloo Memorial Trophy-3rd Division Football Tournament” ba la pynïaid da ka West Jaiñtia District Sports Association (WJDSA) ha ka Sngi Ba-ar ha Kiang Nangbah Stadium.
Ha kane ka jingïakhun u Pynshngaiñ u la ïoh ban thep ha ka minit 54, 57 & 67, kumjuh ïa ki ar kol la thep da u Embor Chyrmang (35+1 & 48). Ïa kiwei pat la thep da u Dawansynshar Dkhar (6) bad u Sooki Chyrmang (18).
Ha kawei pat ka jingïakhun, ka Lumkhangdong Kyndong Tuber bad ka Mookyrdup ki la ïasam mar shi point hadien ba ki la ïakhaid mar 1-1 kol pyrshah ïa ka Pateinki Sabah bad Mustem East. Ïa ka kol jong ka Lumkhangdong la thep da u Pynshaiburom Phawa (60) bad ïa ka kol jong ka Mookyrdup la thep da u Hunbait Langbang (7).
Ha ka jingïalehkai kaba khatduh jong kane ka sngi, ka Riatsaliya bad ka Chyrmang Wah SC ki la ïasam mar shi point hadien ba ki la ïakhaid mar 1-1 kol. Ïa ka kol jong ka Riatsaliya la thep da u Ishanroy Pde (35) bad ïa ka kol jong ka Chyrmang Wah la thep da u Niwan Syad (68).
