Shillong, Naitung 23
Ka P.V Sindhu ka la long napdeng ki 49 ngut ki nongïalehkai ka ri India, ba kynthup ïa baroh kawei ka kynhun ïalehkai siat khnam, table tennis bad hockey, kiba la poi ha Games Village haduh mynta ka sngi Ba-ar ban ïashim bynta ha ka Paris Olympics, ka ban sdang ha ka 26 tarik mynta u bnai.
Katba 39 ngut ki nongïalehkai ba kynthup ïa ka table tennis ba don 8 ngut bad ha ka hockey ha ka liang ki shynrang kaba don 19 ngut, ki la poi sha ka nongbah jong ka France, 10 ngut ki nongsiat suloi na ki 21 ngut kiba la ïoh rung sha ka Olympics, ki la poi sha Chateauroux.
Baroh ki hynriew ngut ki dkhot jong ka kynhun siat khnam ryngkat bad arngut ki nongïalehkai tennis, uwei u nongïalehkai badminton, uwei u nongking lieng bad ar ngut ki nongjngi ki la poi ha katei ka nongbah.
Ki don kumba 117 ngut ki nongïalehkai ba kynthup ïa 70 ngut ki shynrang bad 47 ngut ki kynthei kin mihkhmat ïa ka ri India ha ka Paris Olympics. Kine kin ïakhun ha ki 69 tylli ki jingïakop na ka bynta ban khur 95 tylli ki takma. Kin don don ruh haduh 140 ngut ki nongïarap ïa kitei ki nongïalehkai kiba don haduh 257 ngut.
