Shillong, Naitung 23
Hadien hynriew snem ba la plie, ka True North Leisure Centre ka la buh ïa ka nongrim na ka bynta ka jaka jngi kiba don ïa ka pung hapoh ïing bad kaba long kaba nyngkong eh ban tehlakam ïa ka jingshit jingkhriat ha kane ka ka Jylla.
Pynban kane ka jaka kam dei tang ka jaka ban ïalehkai sngewtynnad, hynrei la hikai ban nang ïa ka sap jngi. Ha ki snem kiba la leit noh da ki spah ngut ki briew, ki khynnah kiba dangrit lem bad kiba heh la san ki la nang ban jngi.
Nalor kane, bun ngut na ki khynnah ki la wan ban shah pyntbit ïalade ha kane ka jaka kaba don ha Mission Compound, ha kaba ki la lah ban wanrah nam bad burom da kaba khur takma ha ki jingïakop jngi kiba la long hapoh ka Jylla, kynthup ïa ka Meghalaya Games kaba la long ha u Kyllalyngkot mynta u snem ha Tura bad ruh ha ka 17th State Aquatic Championships 2024 kaba la kut mynshem taïew.
Ha katei ka jingïakop jngi ba la pynlong da ka Meghalaya Swimming Association, ki khynnah na ka True North Leisure Centre ki la lah ban pynpaw ïa ka jingtbit na ka bynta ban khur haduh 27 tylli ki takma ksiar, nalor ki takma rupa bad rnong. Kaba kham sngewtynnad ka long ba ki la don haduh san ngut ban ïohpdiang ïa ki khusnam Best Swimmer.
Haba ïakren bad ki nongthoh khubor ha ka Sngi Ba-ar, u nongseng jong ka True North u Bah Robinson Jyrwa u la pynpaw da kaba ong, “Ka True North ka shim bai rung na ka bynta ki dkhot bad ki nongjngi namar tang kaba pynsyaid ïa ka um ka long kaba rem dor haduh katta katta khamtam ha ka por tlang, hynrei kam ju shim pisa ïa ki khynnah kiba don sap bad kiba wan na ki longïing bym biang ha ka ïoh ka kot.”
“Ka dei ka jingsarong kaba khraw na ka bynta jong ngi ha ka True North,” la ong ka Kong Shelley Diengdoh kaba la hikai ïa ki khynnah ha ka sap jngi bad ban khur jingjop ha katei ka lympung kaba la kut dangshen. “Mynta u snem ki khynnah ki la leh bha shisha namar ki la trei shitom naduh shwa ban sdang katei ka lympung. Ka jingïakop ha kine ki ar snem ba la dep ka long kaba eh bha, hyneri ka la pynshlur ïa ki nongïaleh-kai jngi jong ngi ban leh kham bha.”
Ban poi shata, ka donkam ïa ka jingaiti met bad mynsiem, naduh ki nongjngi bad wat haduh ki kmie ki kpa jong ki khynnah. “Ki nongjngi ki hap ban bate ïa ka por ha ka jingpule jong ki bad ruh ban pyllait por kumba shi kynta ha ka ban pyntbit ïalade ha ka ban hikai jngi manla ka sngi,” la bynrap ka Kong Diengdoh.
“Ki kmie ki kpa ruh ki la ai ka jingkyrshan kaba pura na ka bynta la ki jong ki khun. Dei ma ki kiba hap ban wanrah ïa la ki khun hangne bad ap ïa ki ha ka por ai jinghikai bad ki la leh ïa kata da ka jingshaniah.”
Na katei ka lympung ïakop jngi kaba dangshu dep, ka Meghalaya Swim-ming Association kan sa jied ïa ki nongjngi kiba kynsai ki ban mihkhmat ïa ka Jylla sha National Swimming Competition ka ban ha Odisha na ka bynta ki ki Sub-Junior bad Junior ha u Nailar mynta u snem, katba ka kyrdan Senior kan long ha Mangalore, Karnataka ha une ujuh hi u bnai.
Watla ka dei ka nonghikai jngi kaba la tbit ha kaba ka la ïoh ïa ka jingpynskhem na ri Bilat, pynban ka Kong Diengdoh ka la ong ba ka long kaba donkam ïa ka MSA ba kan pynbiang da ki coach ba pura hashwa ba kan phah ïa ki khynnah sha kitei ki jingïakop jngi.
Na ka liang uwei na ki rangïalehkai uba la ïoh ka jingshah hikai ha ka True North, u Cleric Jayden Wanñiang uba la khur haduh saw tylli ki takma ksiar (individual), u la ong ba kane ka jingïakop ka long kaba shitrhem bha. Une u rangïalehkai uba la khur lai tylli ki takma ksiar ha ka Meghalaya Games 2024, u la bynrap, “Watla ngim shym la ïoh por haduh katne ban kilan met namar ka jingpule jong ngi, hynrei ngi la aiti ïa kaba bha tam.”
Kane ka pungjngi kaba don ha Mission Com-pound ka don ïa ka jingjrong kaba 20 mitar, hynrei ha kine ki bnai ban wan, ka True North kan sa plie noh ïa ka pungjngi hapoh ïing kaba 25 meter ha kawei ka jaka kaba thymmai kaba don hajan Nongrah. Kane ka jingjrong kan ïaryngkat kumjuh kumba long bad ka pung Crinoline.
Ka jingïakop jngi ka dei kaba kham kongsan ha kaba ki trai jong ka True North ki kham pynleit jingmut bha. Watla ki nongjngi jong ka Jylla ki la nangkiew, hynrei ki dang jngai katto katne ba kin lah ban pyndep hapoh ka por ba la buh. “Khnang ban ïashim bynta ha ki jingïalehkai jong ka ri ki nongïalehkai jngi jong ka Jylla ki shaniah shibun eh ha ki ‘wildcard’ kaba mut ba ki shu ïoh rung suk,” la bynrap u Bah Jyrwa da kaba u la ong ba ka thong jong ka True North ka long ban pynpoi ïa ki nongïalehkai jngi sha ka kyrdan ba kin ïoh ban ïaknieh rung.
