Shillong, Naitung 24
Ka kynhun ki ‘thei ïalehkai ka Jylla ka la mih na ka nongbah ha ka sngi Palei na ka bynta ban leit shim bynta ha ka Junior Girls’ National Football Championship 2024-25 ka ban long ha Belgaum, Karnataka.
Kane ka kynhun ïalehkai hapoh ka jingïalam ka Sharmila Kharbani (Football Coach), ka la don ha ka Group-D ha kaba kan ïakhun pyrshah ïa ka ki khynnah napoh ka shlem ai jinghikai jong ka Sports Authority of India (SAI), kumjuh ka Sikkim bad ka Madhya Pradesh.
Te kumta ka Meghalaya kan ïalehkai nyngkong pyrshah ïa ka SAI ha ka 1 tarik u Nailar, kumjuh ïa ka Sikkim ha ka 3 tarik bad ïa ka Madhya Pradesh ha ka 5 tarik.
Hashwa ba kane ka kynhun kan mih na ka nongbah, na ka liang ka Meghalaya Football Association ka la pynlong ka jingïalang ban ai ka jingkitbok kitrwiang ïa kane ka kynhun ha ka sngi Balang ha madan MFA, Polo. Ha kane ka sngi la ïadon lang u President u Bah Hamletson Dohling lem bad kiwei ki dkhot nongkitkam jong kane ka synjuk, ha kaba ki la ai jingsneng jingkyntu ïa kine ki khynnah ba kin ïalehkai ba ha katei ka lympung bad ruh ban ïoh kheit ïa u soh ka jingjop.
Ki kyrteng ki 22 ngut ki ‘thei ïalehkai ki kynthup ïa ka Alisha Lyngdoh, Eiladki Ksoo, Eightfulness Shangdier, Bira Pyngrope, Blessiful Thongni, Ibashembha Khongsit, Deigrecia Dan, Ibadarihun Nongsiej, Bainangsan Langbang, Adelecia N. Khongwar, Dakini Shylla, Larihun Songthiang, Balabet Khongsit, Judith Kharmuti, Amethis R. Darnei, Philasakhi Marngar, Saphapaïa Lyngdoh, Shishameri L.Peinlang, Bonifilia Shullai, Lapdianghun Rani, Zephania L.Marshilong bad ka Delphinia Syiem. Asst. Coach (Haphilabet Kharkongor), Physio (Lucky Mary Marbaniang) & Manager (Sankidaroi Sajem).
