New Delhi, Nailar:
Ha ka por ba dang jur ka jingpynkhreh ïa ka ilekshon Assembly ha Jammu & Kashmir, ka seng Congress ha ka sngi Ba-ar ka la ong ba ka la long kaba la kloi ban pdiang na ka bynta ka jingïatreilang bad kino kino ki seng kiba long pyrshah ïa ki rukom pyntreikam jong ka seng Bharatiya Janata Party (BJP), la ïathuh ka tyllong khubor kaba la wan na ki nongthoh khubor. Ka seng ka la kynnoh ba ka seng BJP ka la pynjot pynpra ïa ka jingïatylli ha Union Territory.
U nongïalam jong ka seng Congress ha Jammu & Kashmir u Tariq Hameed Karra u la ong, “Ka jingïatylli jong ka seng Congress ha kaba ïadei bad ka jingïatreilang hashwa ka ilekshon ka long kaba shai. Ngi la don ka mon na ka bynta ban ïatreilang bad baroh ki seng kiba long pyrshah ïa ki rukom pyntreikam jong ka seng BJP. Ka jingkhang jong ngi ka plie na ka bynta baroh kiba ïeng pyrshah halor kane ka mat.”
U Karra shuh shuh u la kynthoh ïa ka seng BJP ba ka la pyndonkam bakla ïa ka niam tang kumno ban buh jingma ïa ka shongsuk-shongshngaiñ ha ka imlang-sahlang. “Ïa ka J&K la tip kum ka India kaba rit, ha kaba ïadei bad baroh ar kata ha ka jinglong ka mariang bad ka niam. Ka seng BJP ka la pynpra ïa ka jingïatylli da kaba pynbna ïa ki khubor lamler ha kaba ïadei bad ki niam,” u la ong.
Shuh shuh u Karra u la kynthoh ruh ïa ka seng BJP halor ka jingjur jong ki kam pyntriem ki lehnoh ha UT ha kine ki por. Kumba la sakhi, la ong ba ki nongshong shnong ha ki bynta ba bun jong ka Jammu & Kashmir ki la pynpaw ba ki la dap da ki jingtieng jingsyier khamtam haba ki kam pyntriem jong ki kynhun lehnoh ki la nang ïai bteng biang jan man ka sngi, ha kaba ki la pynpaw ka jingsngewdiaw khamtam ba kim ïohi ban don kino kino ki lad jingïarap bad ka jingphai khmat jong ki bor ka sorkar.
Kum shi bynta ban pynjur ïa ka jingdawa jong ki ïa ka sorkar ba kan leh ei ei ha kaba ïadei bad ka jingtehlakam bad ka jingpynduh pyndam ïa ki kam pyntriem jong ki lehnoh, ki la rai ban ym ïashim bynta ha ka ilekshon Asembly.
Haba ki bor sorkar ki la ïoh jingtip halor kane ka jingthmu jong ki nongshong shnong, ki lai ngut ki heh jong ka Election Commission, kiba kynthup ïa u Chief Election Commissioner bad arngut ki Commissioners, ki la leit jngoh ïa ka Jammu & Kashmir, kum shi bynta ban khmih bniah halor ki jinglong jingman ha ka thaiñ. Ka ilekshon Assembly ha Jammu & Kashmir kan sa long ha ki lai bynta ha ka 18 tarik, Nailur, ha kaba ka jingñiew ïa ki vote kan sa long ha ka 4 tarik, Risaw.
