Shillong, Nailar 22
Ïa ka jingïakhun semi final hapdeng ka Shillong Lajong FC pyrshah ïa ka Northeast United FC la rai ban pynlong noh ha Jawaharlal Nehru Stadium kaba ha Polo, la pynbna ka Durand Cup Organising Committee ha ka sngi Palei.
Ïa kane ka jingïakhun semi final yn pynlong noh ha ka 26 tarik mynta u bnai (lah sngi U Blei) ha ka por 5:30 janmiet. Kane ka rai ka la long ka jingkmen ïa ki paidbah ka Jylla kiba la ïai ap khmih lynti ban ïohi biang ïa ka jingïalehkai na ka bynta ban ai jingkyrshan pura ïa ka Shillong Lajong ka ban ïa pynbor sa ïa kawei pat ka kynhun ïalehkai jong ka Indian Super League (ISL).
Ïa kane ka rai ban pynkynriah la shim lyngba ka jingmih na ka jingïakhun quarter-final ba la long ha ka sngi Balang ha kaba haduh 15 hajar ngut ki paidbah kiba la pyndap hi smam ïa ka stadium hi baroh kawei.
Ha baroh ar tylli ki jingïakhun la ïohi ïa ka jingïalehkai kaba itynnad bha jong ka Northeast United FC bad kumjuh ka Shillong Lajong FC, ha kaba ki la lah ban khur ïa ki jingjop jong ki. “Kum ka jingburom ïa kine ki ar tylli ki kynhun, ngi la rai ban pynkynriah noh ïa ka jingïakhun semi-final hapdeng ka Northeast United bad ka Shillong Lajong sha ka nongbah Shillong ka ban long ha ka 26 tarik u Nailar,” la pynpaw ka kyrwoh.
Kane ka jingrai ka long ban pynthikna ba ki nongkyrshan, kiba long ka dohnud bad ka mynsiem jong kane ka lympung, kin ïoh mad ïa ka jingkmen jong kane ka jingïalehkai kaba kongsan jong kine ki ar tylli ki kynhun. “Ngi ngeit ba kane ka jingpynkylla kan wanrah ka jingbha ha kane ka lympung bad ruh ban ïarap ïa ki kynhun ba kin ïoh jingkyrshan na ki paidbah khnang ba nawei na kine kan ïoh rung sha ka final. “
Ngi sngewnguh shibun ïa ka jingïatreilang jong ka tnad ïalehkai ka sorkar West Bengal ha jingïasngewthuh jingmut lang, kiba la pdiang ban pynkynriah noh ïa kane ka jingïakhun semi final na ka bynta ka jingbit jingbiang ki paidbah nongkyrshan jong ka Northeast United bad ka Shillong Lajong.
Ha kawei pat ka liang ka Sorkar Jylla ka la kam ba ka la ïakren bad ka Organising Committee na ka bynta ban wanrah ïa ka jingïakhun semi final sha kane ka nongbah.
U Myntri ba dei khmih ïa ka tnat ïalehkai jong ka Sorkar Jylla, u Bah Shakliar Warjri u la ong ba da ka jingangnud bad ka jingthrang ki riewïeid phutbol ban sakhi da la ki jong ki khmat ïa ka semi final ha JN Stadium ka la urlong.
Te kumta u Bah Shakliar la ai ruh ka jingkitbok kitrwiang ïa ka Shillong Lajong ba kan ïalehkai bha khnang ban wanrah ïa ka jingjop haduh kaba kut jong kane ka lumpung. Te kumta u la ïathuh ba ka tnat ba dei peit ïa katei ka lympung kan sa buh ïa ki jaka die ticket ha manla ki District bad yn sa pynlait ïa ki ticket ha ka 24 tarik.
