Agartala, Nailar:
Hadien ka jingïoh khubor halor ka jingshlei um kaba jur kaba la wanrah ïa kiba bun ki jingjulor ha Tripura, u nongïalam ka seng Congress u Rahul Gandhi u la kyntu ïa ka sorkar kmie bad ka sorkar jylla ba kin pyntreikam kham kloi ïa ka kam kaba ki dei ban leh bad ban pynsted ïa ka ha ka ban pyllait im bad ban ai jaka sah ïa ki lanot.
Ha kaba ïadei bad kane, u Gandhi u la pynpaw ïa ka jingsngewlem, da kaba ong, “Ki jingmut jingpyrkhat jong nga ki don bad ki hynmen, para kynthei bad shynrang jong ngi kiba ha Tripura, kiba da ka jingbym banse ki la hap ban sah ha ki jaka sah ba shipor namar ka jingwan jong ka jingshlei um ba la wanrah da ka jinghap jong u slap uba jur bad ki jingtwa khyndew kiba ïai bteng.”
Shuh shuh u la phah ka jingsngewlem sha ki longïing kiba la duhnoh ïa ki baïeid-bathoiñ jong ki na ka jingthombor ki bor ka mariang.
U la ong, “Ka long kaba kongsan ba baroh ar, ka sorkar kmie bad ka sorkar jylla ba kin pyntreikam kyrkieh ïa ka jingthmu pyntreikam bad ban pynsted ïa ki jingpyntreikam ban pyllait im bad ai jaka sah ïa ki lanot, bad ban pynthikna ïa ka jingsiew bai lutksan kaba biang na ka bynta kito kiba shah ktah jur.”
Ki la don palat 34,000 ngut ki briew kiba la sah ha ki jaka sah ba shipor katba ki la don kumba 10 ngut ki briew kiba la ïap na kiba bun ki jingjia kiba la mih na ki jingthombor ki bor ka mariang ha ka jylla.
Ki la don shuh sa kumba san tylli ki kynhun na ka National Disaster Response Force (NDRF) kiba la leit ban ai jingïarap sha ka jylla kiba na Arunachal Pradesh bad na Silchar, Assam.
