Shillong, Nailar 23
Ka Sorkar Jylla ka la pynpaw ka jingsngewkmen hadien ba ki bor pynïaid ka Durand Cup Organising Committee ki la shim ïa ka rai ba ïa ka jingïakhun semi final hapdeng ka Shillong Lajong FC pyrshah ïa ka Northeast United FC ban pynlong noh ha Jawaharlal Nehru Stadium, Pol.
Ïa kane ka jingïakhun semi final yn pynlong ha ka 26 tarik mynta u bnai ha ka por 5.30 janmiet.
Kat kum ka kyrwoh ba la pyllait da u Myntri ba dei khmih ïa ka tnat ïalehkai jong ka Sorkar Jylla, u Bah Shakliar Warjri u la pynpaw ba kane ka dei lyngba ka jingkyrpad ka sorkar Jylla hapoh ka jingïalam u Myntri Rang-bah u Conrad K Sangma ïa ki heh shipai kiba long ki nongpyniaid ia ka Durand Cup.
“Hadien ba ka Shillong Lajong FC ka la rung sha ka semi final lyngba ka jingjop ia ka East Bengal da 2-1 kol, ma nga lem bad u Conrad Sangma ngi la kyrpad ïa ki bor ba khmih jong ka Durand Cup Organisng Committee na ka bynta ban wanrah ïa ka jingïalehkai semi final sha kane ka nongbah namar bad kane ka la urlong,” u labynrap.
Namar bun na ki paidbah kim shym la ïoh ban rung sha stadium namar bym don tiket shuh ha ka jingïakhun quarter final pyrshah ïa ka East Bengal, u Bah Shakliar ha kane ka kynti kaba mynta u la pynbna ban pynïeng noh da ki ‘giant screen’ ha ki katto katne ki jaka jong kane ka nongbah khnang ba ki paidbah kin ïoh ban sakhi ïa katei ka jingïa-lehkai semi final.
U Bah Shakliar u la ong ruh ba yn pynbiang ruh ïa ki jaka die ïa ki tiket ha manla la ki district kum ha Jowai, ha ki thaiñ jong ka Ri Bhoi bad ha ka thaiñ West Khasi Hills khnang ban kham pynsuk ïa ki paidbah. Kane ka jingdie ïa ki tiket kan sdang naduh ka sngi Saitjaiñ ha baroh ki jaka die.
Te kumta ha kaba kut utei Myntri ka tnat ïalehkai u la wer ïa ki paidbah ba kin wan ban sakhi ïa katei ka jingïalehkai khnang ban ai jingkyrshan pura ïa ka Shillong Lajong ba kan lah ban ïalehkai bha ha katei ka jingïakhun semi final kumba ka la lah ban pynliem ïa ka East Bengal ha ka quarter final.
