Jowai, Nailur 15
Ka Red Mark FC ka la ïoh jingjop ha ka lympung ïalehkai 8th Invitation Knockout Football Tournament ba la pynïaid da ka Wahïajer Sports Club hadien ba ka la lah ban pynliem noh ïa ka Mukhla Wahchnong da 4-2 kol ha ka Sngi Saitjaiñ ha madan Wahïajer Sports Complex.
U Sngiwanpynsuk Kurbah u la ïoh ban thep ar kol, katba ïa kiwei pat la pynbud da u Wansiewdor Nengnong bad u Angelus Biam na ka byna ban pynlong ïa kane ka kynhun ban khur ïa ki lai point.
Ha kane ka jingïakhun baroh ar ki kynhun ki la pyrshan ban ïalehkai bha naduh kaba sdang. Hadien shiteng kynta ka Red Mark ka la ïoh ban thep ar kol lyngba u Sngiwanpynsuk ha ka minit kaba 33 & 38. Kane ka kynhun ka la pynbud biang ï aka kol kaba ar lyngba u Wansiewdor ha ka minit 40 na ka bynta ban tam da 3-0 kol ha ka kylla step.
Hadien katto katne por ba la bteng ïa ka jingïakhun jong ka kylla miet ka Mukhla Wahchnong ka la lah ban pynphai kylla shi kol lyngba u Chandame Suna ha ka minit kaba 53. Ka Red Mark ka la thep biang ïa ka kol kaba saw lyngba u Angelus ha ka minit 78. Hashwa ban wai Mukhla ka la thep biang sa shi kol lyngba u Riben Talang ha ka minit kaba 80+1 hashwa ba kan mad ïa ka jingshah rem. Ïa ka nam ‘Man of the match’ la khur da u rangïalehkai ka Red Mark u Wansiewdor Nengnong.
Ka jingïalehkai ha ka lah sngi U Blei kan long hapdeng ka Friend United pyrshah ïa ka Monjurlang FC ha ka por 2:30 nohphai sngi.
