Shillong, Nailur 15
Ka kynhun ïalehkai jong ka AG Meghalaya ka la rah ïa ka nam lahduh ha ka Big FM’s Big Futsal Fest, Shillong’s 1st Inter Office Futsal Tournament. Kane ka la wan urlong hadien ba ka la pynliem noh ïa ka Meghalaya Secretariat Home Guards da 6-1 kol ha ka jingïakhun final kaba la long Thrive Sports Arena, Langkyrding.
Ki nam tam ha kane ka jingïakhun ka la wan urlong lyngba u Sheen Stevenson Sohktung lem bad u Rustomwell Khriam kiba la lah ban lamkhmat ïa la ka shlem treikam ban thep mar ar kol. Katba u Fivestar Shylla u nongïalehkai ba paw ha kane ka lympung uba la ïoh ban thep 17 kol da kaba u la bynrap biang sa shi kol ha kane ka jingïakhun final, ïa kaba kam shym la lah pat ban ïarap ïa ka kynhun ïalehkai kaba u la mihkhmat ban kynjoh sha ka thong jingjop.
La pynkut ïa kane ka lympung ïalehkai da ka jingsam ïa ki khusnam ha kaba u Fivestar Shylla u la ïoh ïa ka Golden Boot, u Sheen Sohktung ïa ka Golden Ball, katba u rangapkol ka MIM-HANS u Kitbok Nong-rum u la ïoh ïa ka Gol-den Glove.
Ïa kine ki khusnam la sam da u rangïalehkai ka Jylla uba la mihkhmat teng ruh mynshwa ïa ka ri u Aiborlang Khongjee.
Shwa ban sdang kane ka jingïakhun ka la don ka jingïalehkai paralok jong ki kynthei hapdeng ki ‘thei ïalehkai ba dei ki nongtrei jong ka Rani Motors bad ki nongtrei ka MIMHANS.
ïa kane ka lympung la pynlong da ka Big FM ryngkat ka jingkyrshan jong ka tnat ïalehkai jong ka Sorkar Jylla, ka Maruti Suzuki Arena, Royal Enfield, Indian Bank, bad Directorate of Information & Public Relations.
