Shillong, Nailur 16
Uwei na ki nongmareh ka Jylla u Ratan Dhar uba la 69 snem ka rta ba shong ba sah ha Quinton Road u la wan ha ka kyrdan ba nyngkong ha ka jingïakob mareh kaba 21 kilometre ba la tip kum ka Ladakh Marathon kaba la long ha ka 8 tarik mynta u bnai.
U Ratan u la leit ban ïashim bynta ha ka kyrdan ïa mareh kaba 60 snem shaneng. U la lah ba un pyndep ïa ka thong ha ka por 2:33: 8 sekhon.
Ha kane ka jingleit ïashim bynta la don ruh kiwei ki nongmareh na kane ka jylla kiba la leit ban ïashim bynta, hynrei u Ratan marwei pat u la long u nongïashim bynta ban kynjoh sha ka thong jong ka jingjop.
Kum u nongmareh, u Ratan u ïathuh ba u la shim ïa ka kam mareh kum kawei na ka kam ha ka jingim mynta la 30 snem. Ka jingthmu ka jong u hi ka long kumno ba un lah ban pynneh ïa ka koit ka khiah bad jinglong ba smat bad ba sting jong ka met ha ka jingim.
Naduh ba u shim ïa ka kam mareh, u don bun ngut ki paralok ba smat ïa mareh, namar dei lyngba jong ki ka pynlong ïa u ban nang ïai imsngi ban mareh ha ka jingim jong u.
Kane ka jingïai imsngi ka la ktik pat ïa u ban poi ïashim bynta ha kiba bun ki marathon ha kaba u la pynpaw ba u la ïashim bynta ruh ha ka sien ba nyngkong jong ka Sohra Marathon.
Kiwei ki jingïakob mareh kiba u Ratan u la poi ban ïashim bynta ka kynthup ïa ka Mumbai Marathon, Bangalore Marathon, Goa Marathon, Kolkata Marathon, Olympic Day Run ba ju pynlong man la u snem da ka Meghalaya State Olympic Association, Independence Day Marathon bad ka Marathon ba pynlong da ka Assam Rifles.
Haba batai shaphang ka jingleit ïashim bynta sha ka Ladakh Marathon, u Ratan u la ïathuh ba u la hap ban leit sah lypa bun bun sngi sha katei ka jaka, namar ba dei ka jaka kaba don ha kynjang lum (high altitude), kaba donkam bha ïa ki briew kiba shong ba sah kham ha them ba kin pynmlien lypa ïa la ka jong ka met bad ka suiñ bneng ruh ka long kaba khriat bha.
Shuh shuh u la ïathuh ruh ba bun ki nongïashim bynta kim lah ban pyndep ïa ka thong ba ki ïakhun namar ki shem jingeh bha kaba bunsien hap ban pynkit noh ïa ki da ka ambulance.
Ha kaba kut u Ratan u ïathuh ba u la dep ban ai kyrteng ban ïashim bynta ha ka 3rd Sohra International Half Marathon ka ban long ha ka 21 tarik mynta u bnai.
