Khliehriat, Nailur 16
Ka Pamra Paithlu SSC, Ïapamala United SC, Ïongkaluh SCSC bad Rymbai Pohskur SC ki la shah pynhiar kyrdan noh sha ka Third Division.
Kane ka wan hadien ka jingbym lah jong ki ban ïalehkai bha ha kane ka aïom ïalehkai Second Division Football Tournament ba la pynïaid da ka East Jaiñtia Hills District Football Association (EJHDFA).
Ka Moosiang Lamare New YWOSC, Kairang CSC, SWO Moosiang Lamare Old SC bad Khliehmyntriang SCSC ki la lah ban pynurlong na ka bynta ban ïai sah ha ka Second Division.
Haba phai sha ka miej ïakheiñ poiñ, ka Rymbai Madanpyriang SC ka dangïai bat ïa ka kyrdan ba hakhlieh duh da kaba kamai 9 poiñ ha ka jingiakhun kaba mar laisien, bud sa ka Musniang SC bad Deinshalalu kiba kamai mar 7 poiñ.
Ka Umlyngsha Youth SSC bad ka Lakadong Umlatdoh ki kamai mar 5 poiñ. Katba ka Ladrymbai Dongwah SWSC, Lumputhoi SC ki kamai mar 4 poiñ, katba ka Sutnga Mission SSCC ka kamai 3 poiñ.
