Shillong, Nailur 16
Ka Mawryngkneng SC ka la ïoh jingjop ha ka lympung ïalehkai Third Division Football League 2024 ba la pynïaid da ka Shillong Sports Association hadien ba ka la lah ban pynliem noh ïa ka Lapalang SC da 5-2 kol ha ka Lah Sngi U Blei.
Kane ka la wan urlong lyngba ka hat-trick na u Banker Mynsong na ka bynta ban pynlong ïa katei ka kynhun ban ïoh ïa ki point.
Ha kane ka jingïakhun kaba la long ha SSA Stadium Polo, ka Lapalang ka la ïoh ban pynkhih jar nyngkong eh lyngba u Sonjalen Haokip ha ka minit kaba 18. Hadien shiteng kynta ka Mawryngkneng ka la lah ban pynphai kylla ar kol lyngba u Banker Mynsong ha ka minit kaba 27 & 36.
Ha ka kylla miet ka Mawryngkeng ka la thep biang ïa ka kol kaba lai lyngba u Wanbha War ha ka minit kaba 54. Hadien san minit ka Lapalang ka la lah ban pynphai kylla shi kol lyngba u Alex Kharkrang ha ka minit kaba 59.
Hadien katto katne por ka Banker u la khur syndon ïa ka hat-trick hadien ba u la thep biang sa shi kol ha ka minit kaba 65 bad ïa kawei pat la thep da u Baehbok Sari ha ka minit ba 67 na ka bynta ban pynlong ïa ka Mawryngkneng ba kan khur syndon ïa ka jingjop.
Haba phai sha kawei pat ka jingïakhun kaba la long kham hashwa, ka Lawmali SC ka la pynliem noh ïa ka Umpling SC da 3-1 kol. Kane ka la wan urlong lyngba u Richmond Buam uba la thep ha ka minit kaba 4, kumjuh u Dameshwa Malngiang (41) bad u Arki Païa Tariang (90). Katba na ka liang ka Umpling ka la thep shi kol lyngba u Busel lynchiang (23) hashwa ba kan mad ïa ka jingshah rem.
Ka jingïalehkai ha ka Sngi Ba-ar kan long hapdeng ka Lamlynti FC pyrshah ïa ka Sanmer SC ha ka por 12:30, katba ka Kharang SC ïa ka Pomlakrai SC ha ka por 3:30 janmiet.
