Jowai, Nailur 16
Shi bynta ka jingpynkhreh ïa ka 6th Meghalaya Games 2025 ka ban long ha Jowai bad Wahïajer, ka Meghalaya Weightlifting Association (MWA) ryngkat ka jingïatreilang bad ka shlem treikam jong u District Sports Officer (DSO) West Jaiñtia Hills, kin pynlong da ka jingïakob rahnar kaba shi sngi na ka bynta ki shynrang bad kynthei ïa kaba tip kum ka “2nd Meghalaya State Weightlifting Championship”.
Haba kren sha ki lad pathai khubor ha ka sngi Saitjaiñ, ki nongïalam jong ka Meghalaya Weightlifting Association naduh u President Donald Rymbai, Joint Secretary Anthony Kharnaïor ki la pyntip ba ïa kane ka jingïakob yn pynlong ha ka 26 tarik u Risaw ha Ïungwalieh ha Dorbar Shnong Tpep Pale.
“Kane ka jingïakob ka long na bynta ban sei madan ïa ki khynnah ka thaiñ rilum Jaiñtia kiba don ka sap bad ka jingkhlaiñ ban rah nar ban ïashim bynta ha ka Meghalaya Games 2025,” la pynpaw u President Bah Donald Rymbai haba ïakren bad ki lad pathai khubor.
Kine ki nongïalam ki la khot la wer ïa ki khynnah bad samla ka rilum Jaiñtia khamtam ki khynnah na ka sor Jowai ban wan ïashim ha kane ka jingïakop kaba paw bha ha ka Olympic Games bad Asian Games.
U Bah Khroobok Passah (DSO) ka West Jaiñtia Hills bad uba bat ruh kum u Asst. Director ka tnat ïalehkai u la wer kyrpang ïa ki khun samla shynrang bad kynthei jong kane ka thaiñ ba kin wan ban ïashim bynta bad ban shim ïa kane ka kabu ksiar.
Shuh shuh kine ki nongïalam, ki la pyntip ruh ba ha ka 25 tarik Risaw ka MWA kan pyni shwa ïa ka Demo ha kaba ïadei bad kane ka jingïalehkai namar ka long kaba thymmai hapoh rilum Jaiñtia bad kino kino ki khynnah kiba kwah ban ïashim bynta ha kane ka jingïakop ki lah ban wan ha ka por 4 baje haduh 6 baje janmiet ha Iungwalieh Tpep Pale. Ïa ki jingtip kiba kham bniah lah ban phone ha ki number 8729992091 & 8730837484.
