Shillong, Nailur 18
Ar ngut ki rangïalehkai ka Jylla u Banlamkupar Rynjah bad u Manbhakupar Malngiang ki ka shah kynthup hapoh ka kynhun ïalehkai ka ri India na ka bynta ka SAFF U-17 Championship 2024 ka ban long ha Bhutan.
Kane ka la wan hadien ba ka kyrteng jong ki ka la paw hapoh ka thup jong 23 ngut ki rangïalehkai ba la pynbna da u coach ka kynhun u Ishfaq Ahmed ha ka Sngi Ba-ar.
Ha katei ka lympung ka India kaba don ha ka Group-A kan ïakhun pyrshah ïa ka Bangladesh ha ka 20 tarik mynta u bnai bad ïa ka Maldives ha ka 24 tarik.
Ïa ka jingïakhun semi-final yn pynlong ha ka 28 tarik mynta u bnai bad ïa ka final yn pynlong ha ka 30 tarik. Ïa baroh kitei ki jingïalehkai yn pynlong ha Changlimithang Stadium kaba ha Thimphu.
Kumta kane ka kynhun kan mih na ka jaka kilanmet kaba ha Srinagar ha ka Sngi Balang na ka bynta ban leit sha Thimphu.
