Islamabad, Naiwieng:
U President ka Pakistan, u Asif Ali Zardari u la kheiñ khylliah ha ka por ba u dang hiar na ka liengsuiñ hadien ba u la poi ha ka Kad Liengsuiñ jong ka Dubai International Airport.
Kane ka la jia ha ka miet Sngi Balang, hynrei na ka shlem treikam jong utei u heh, ki dang pynbna ia kane ka khubor haduh ka miet Sngi Palei.
Katkum ka jingpynbna na katei ka shlem treikam jong u, la pyntip ba ki la pynkit noh ia u mar-mar sha ka jaka sumar kaba don hajan hadien ba u hap na katei ka jaka hiar na liengsuiñ ha katei ka sngi. Na ka liang ki doktor kiba peit bniah ia ka jinglong-jingman jong ka kjat jong u hadien katei ka jingjia la shem ba ka shyieng kjat jong u ka la pait bad u donkam ban ioh ia ka jingsumar la kumno-kumno kumba saw taiew lane shi bnai tam.
